ក្រសួងជនភៀសខ្លួន និងធ្វើមាតុភូមិនិវត្តន៍របស់អាហ្វហ្គានីស្ថាន បាននិយាយកាលពីថ្ងៃអាទិត្យថា៖ ចំនួនអ្នកស្លាប់ដោយសារជំនន់ទឹកភ្លៀង នៅក្នុងខេត្ត Baghlan ភាគខាងជើងនៃប្រទេសអាហ្វហ្គានីស្ថាន បានកើនឡើងដល់315នាក់ និង 1,630 នាក់បានរងរបួស។
ភ្លៀងធ្លាក់ខ្លាំង បណ្តាលឱ្យមានទឹកជំនន់ហូរកាត់ខេត្តជាច្រើន របស់អាហ្វហ្គានីស្ថាន ។
ដោយទីក្រុង Baghlan រងការវាយប្រហារខ្លាំងបំផុត ដោយបានបំផ្លាញផ្ទះសម្បែងពី 2,500 ទៅ 3,000 ខ្នង សម្លាប់សត្វពាហនៈរាប់រយក្បាល និងខូចខាតផ្លូវថ្នល់ និងហេដ្ឋារចនាសម្ព័ន្ធផ្សេងទៀតក្នុងរយៈពេលបីថ្ងៃកន្លងមកនេះ។
កាលពីខែមុន មនុស្សយ៉ាងហោចណាស់ 70 នាក់បានស្លាប់ និងរាប់សិបនាក់ផ្សេងទៀតបានរងរបួសនៅក្នុងភ្លៀងធ្លាក់ខ្លាំង និងទឹកជំនន់នៅតំបន់ផ្សេងៗគ្នានៃប្រទេសដែលហែកហួរដោយសង្រ្គាម។
រដ្ឋមន្ត្រីក្រសួងសេដ្ឋកិច្ចបណ្តោះអាសន្ន លោក Din Mohammad Hanif បានជំរុញឱ្យអង្គការសហប្រជាជាតិ ទីភ្នាក់ងារមនុស្សធម៌ និងធុរកិច្ចឯកជន ផ្តល់ការគាំទ្រដល់អ្នករងគ្រោះដោយទឹកជំនន់។
ប្រទេសប៉ាគីស្ថាន ដែលជាអ្នកជិតខាងរបស់អាហ្វហ្គានីស្ថាន ក៏រងការវាយប្រហារដោយភ្លៀងធ្លាក់ និងទឹកជំនន់ ដែលបានសម្លាប់មនុស្សជិត 100នាក់ និងរាប់សិបនាក់ផ្សេងទៀតរងរបួសនៅក្នុងខែមេសា៕