ចំនួនអ្នកស្លាប់ដោយសារ ការបំផ្ទុះគ្រាប់បែកអត្តឃាត កាលពីចុងសប្តាហ៍មុន នៅឆ្នេរខ្សាច់ក្នុងតំបន់ Lido នៃរដ្ឋធានី Mogadishu ប្រទេសសូម៉ាលី បានកើនឡើងដល់ ៣៧នាក់ហើយ គិតត្រឹមថ្ងៃអាទិត្យនេះ…!។
លោក Ahmed Abdi មន្ត្រីប៉ូលីសនៅទីក្រុង Mogadishu ដែលបាននិយាយតាមទូរស័ព្ទ ទៅកាន់ Anadolu បាននិយាយថា គិតមកត្រឹមពេលនេះ ចំនួនមនុស្សស្លាប់នៅក្នុងការវាយប្រហារ ដ៏សាហាវនេះ មានចំនួន៣៧ នាក់ ខណៈជិត ៧០នាក់ផ្សេងទៀត បានរងរបួស។
លោកបាននិយាយថា ការស៊ើបអង្កេត កំពុងដំណើរការ។
ខណៈរដ្ឋាភិបាល បានដាក់ឈ្មោះគណៈរដ្ឋមន្ត្រី ដែលមានភារកិច្ចសម្របសម្រួល បបន្ទាន់ និងការគាំទ្រដល់អ្នករបួស។
នាយករដ្ឋមន្ត្រីសូម៉ាលី Hamza Abdi Barre ដែលបានទៅទស្សនាមន្ទីរពេទ្យ Recep Tayyip Erdogan ក្នុងរដ្ឋធានីបាននិយាយថា មន្ត្រីសន្តិសុខ និងទាហានដែលទទួលបន្ទុកតំបន់ដែលការវាយប្រហារបានកើតឡើងត្រូវបានចាប់ខ្លួនដោយសារតែការធ្វេសប្រហែស។
លោក Barre បាននិយាយនៅក្នុងសេចក្តីថ្លែងការណ៍ខ្លីមួយ នៅលើ X ប៉ុន្តែលោកមិនបានបញ្ជាក់លម្អិតបន្ថែមទៀតថាតើទាហាន និងមន្ត្រីប៉ុន្មាននាក់ត្រូវបានចាប់ខ្លួន។
គួរបញ្ជាក់ថា ក្រុមភេរវករ al-Shabaab ដែលមានសម្ព័ន្ធភាពជាមួយអាល់កៃដា បានអះអាងទទួលខុសត្រូវចំពោះការ វាយប្រហារនេះ។
ការបំផ្ទុះនេះ គឺជាការវាយប្រហារភេរវកម្មដ៏សាហាវបំផុត សម្រាប់ប្រទេសសូម៉ាលី ក្នុងឆ្នាំនេះ។
ចាប់តាំងពីឆ្នាំ 2007 មក al-Shabaab បានប្រយុទ្ធជាមួយរដ្ឋាភិបាលសូម៉ាលី និងបេសកកម្មផ្លាស់ប្តូរសហភាពអាហ្រ្វិកនៅប្រទេសសូម៉ាលី (ATMIS) ។
ដែលជាបេសកកម្មចម្រុះដែលត្រូវបានអនុញ្ញាតដោយសហភាពអាហ្រ្វិក និងអាណត្តិដោយក្រុមប្រឹក្សាសន្តិសុខអង្គការសហប្រជាជាតិ។
Al-Shabaab បានបង្កើនការវាយប្រហារចាប់តាំងពីប្រធានាធិបតីសូម៉ាលីលោក Hassan Sheikh Mohamud បានប្រកាស សង្រ្គាមទាំងស្រុង លើក្រុមនេះ៕