(ភ្នំពេញ)៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានអរគុណប្រទេសមួយ ដែលមកប្រាប់ថា កុំឱ្យប្រទេសមួយទៀត មកវិនិយោគនៅកំពង់សោម ប្រយ័ត្នបាត់អធិបតេយ្យភាព។
ប្រទេសនោះ បានប្រាប់សម្ដេចកុំទុកចិត្តប្រទេសមួយហ្នឹង ព្រោះគេចង់បានកន្លែងហ្នឹង តាមរយៈការធ្វើសកម្មភាពនៅកំពង់សោម។
សម្តេចធិបតី បានឆ្លើយតបទៅវិញថា៖ ប្រជាពលរដ្ឋខ្មែរមិនល្ងង់ទេ យើងក៏មានសមត្ថភាពមើលដែរថាអ្វីល្អឬអាក្រក់ ជាក់ស្តែងមកដល់ពេលនេះ កំពង់សោមមិនមានការបាត់បង់អធិបតេយ្យភាពនោះទេ។
សម្តេចធិបតី បានគូសបញ្ជាក់ថា រាជរដ្ឋាភិបាលបានរៀបចំគម្រោង៥ឆ្នាំហើយដើម្បីពង្រឹងខេត្តជាប់សមុទ្ររបស់យើងជាសក្តានុពល និងជាគ្រាប់ពេជ្ររបស់កម្ពុជា មិនមែនគ្រាប់ពេជ្ររបស់អ្នកណាទេ ពោលគឺយើងពង្រឹងខ្លួនឯង យើងម្ចាស់ការខ្លួនឯង ដោយខិតខំបង្កើនធនធានមនុស្សដើម្បីចេញទៅធ្វើការនៅគ្រប់កន្លែង។
សម្តេចធិបតី បានថ្លែងដូចនេះនៅក្នុងឱកាសដែលសម្តេចអញ្ជើញជាអធិបតី ប្រគល់សញ្ញបត្រជូនដល់និស្សិត នៃសាកលវិទ្យាល័យពុទ្ធិសាស្រ្ត នៅព្រឹកថ្ងៃទី០៦ ខែសីហា ឆ្នាំ២០២៤៕
