ក្រសួងការពារជាតិកូរ៉េខាងត្បូង បាននិយាយកាលពីថ្ងៃសុក្រ(ទី៦ខែកញ្ញា)ថា យោធាកំពុងដាក់ពង្រាយប្រព័ន្ធប្រឆាំងយានដ្រូន រួមបញ្ចូលគ្នា នៅក្នុងទីតាំងជាច្រើននៅទូទាំងប្រទេស។
ដើម្បីទប់ទល់នឹងការ គំរាមកំហែងដែលបង្កឡើង ដោយយានដ្រូនពីប្រទេសកូរ៉េខាងជើង…!។
ការសម្រេចនេះ កើតឡើងនៅពេលដែលប្រទេសកូរ៉េខាងត្បូង បានជំរុញឲ្យពង្រឹងសមត្ថភាពឆ្លើយតបដោយយានដ្រូនរបស់ខ្លួន ។
បន្ទាប់ពីយានដ្រូនរបស់កូរ៉េខាងជើងចំនួន ៥គ្រឿង បានឆ្លងកាត់ព្រំដែន ក្នុងខែធ្នូ ឆ្នាំ ២០២២ ដោយក្នុងនោះមានមួយគ្រឿង បានចូលដល់ទីក្រុងសេអ៊ូល។
យោធា បានបរាជ័យក្នុងការស្ទាក់ចាប់យានដ្រូនណាមួយ ដោយជំរុញឲ្យបង្កើនការត្រៀមខ្លួនជានិច្ច។
មន្ត្រីក្រសួងការពារជាតិម្នាក់ បាននិយាយថា៖ប្រព័ន្ធរួមបញ្ចូលគ្នាប្រឆាំងយានដ្រូននេះ កំពុងដំណើរការនៅក្នុងទីតាំងសំខាន់ៗ ដើម្បីឆ្លើយតបទៅនឹងការគំរាមកំហែងដែលបង្កឡើងដោយយានដ្រូនរបស់កូរ៉េខាងជើង។
ប្រព័ន្ធរួមបញ្ចូលគ្នានេះ មានឧបករណ៍ជាច្រើន រួមទាំងរ៉ាដា និងឧបករណ៍ចាប់សញ្ញាយានដ្រូន ដែលធ្វើឲ្យវាមានសមត្ថភាពក្នុងការស្វែងរក តាមដាន និងបាញ់ទម្លាក់យានដ្រូន។
យោធាត្រូវបានគេរាយការណ៍ថា គ្រោងនឹងដាក់ពង្រាយប្រព័ន្ធប្រហែល ២០គ្រឿង ទៅកាន់អង្គភាពមួយចំនួន ក្រោមបញ្ជាការដ្ឋានការពាររដ្ឋធានី និងអ្នកផ្សេងទៀត ដែលទទួលបន្ទុកការពារតំបន់សំខាន់ៗ៕