(ភ្នំពេញ)៖ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នឹងបំពេញទស្សនកិច្ចនៅប្រទេសបារាំង ចំនួន២ថ្ងៃ ចាប់ពីថ្ងៃទី១៨ ដល់ថ្ងៃទី១៩ ខែមករា ឆ្នាំ២០២៤។
តបតាមការអញ្ជើញ របស់ប្រធានាធិបតីបារាំង លោក អេម៉ានុយអែល ម៉ាក្រុង នាថ្ងៃទី៣១ ខែធ្នូ ឆ្នាំ២០២៣កន្លងទៅ ហើយត្រូវបានក្រសួងការបរទេស និងសហប្រតិបត្តិការអន្តរជាតិកម្ពុជា បកប្រែក្រៅផ្លូវការ និងបានផ្សព្វផ្សាយជាសាធារណៈនាថ្ងៃទី៣ ខែមករា ឆ្នាំ២០២៤។
ការអញ្ជើញទៅបំពេញទស្សនកិច្ចក្រៅផ្លូវការរបស់សម្តេចធិបតី នាយករដ្ឋមន្រ្តីកម្ពុជា ទៅកាន់ប្រទេសបារាំងនាពេលនេះ នឹងបង្កើននូវវឌ្ឍនភាព និងកាន់តែមានភាពច្បាស់លាស់ថែមទៀតទៅលើវិស័យជាច្រើន រវាងកម្ពុជា និងបារាំង។
យោងតាមលិខិតអញ្ជើញរបស់លោកប្រធានាធិបតីបារាំង បានបញ្ជាក់ថា«ឯកឧត្តមនាយករដ្ឋមន្ត្រីជាទីស្រឡាញ់! មិត្តជាទីស្រឡាញ់។
ខណៈពេលដែលព្រះរាជទស្សនកិច្ចផ្លូវការរបស់ព្រះមហាក្សត្រនៅកាន់ទីក្រុងប៉ារីសកាលពីខែកន្លងទៅ បានបង្ហាញអំពីភាពរឹងមាំនៃចំណងមិត្តភាពរបស់ប្រទេសយើងទាំងពីរ និងរបស់ប្រជាជនរបស់យើងកម្ពុជា-បារាំង ខ្ញុំមានកិត្តិយសសូមគោរពអញ្ជើញឯកឧត្តម ធ្វើទស្សនកិច្ចផ្លូវការនៅប្រទេសបារាំងនៅថ្ងៃទី១៨ និងថ្ងៃទី១៩ ខែមករាខាងមុខនេះ។
លោកប្រធានាធិបតី បានបញ្ជក់បន្ថែមទៀតថា ដំណើរទស្សនកិច្ចលើកដំបូងនៅប្រទេសបារាំងនេះ ចាប់តាំងពីការឡើងកាន់តំណែងជានាយករដ្ឋមន្ត្រី នឹងអនុញ្ញាតក្នុងការបង្កើននូវវឌ្ឍនភាព និងកាន់តែមានភាពច្បាស់លាស់ថែមទៀតទៅលើវិស័យជាច្រើនផ្សេងទៀត ជាពិសេស គឺចំពោះទំនាក់ទំនងទ្វេភាគីរវាងប្រទេសយើងទាំងពីរ ជាពិសេសនៅក្នុង វិស័យសេដ្ឋកិច្ច ការអភិវឌ្ឍ វិស័យការពារជាតិ បេតិកភណ្ឌ និងភាសាបារាំង។
លោកអេម៉ានុយអែល ម៉ាក្រុង បានសង្កត់ធ្ងន់ទៀតថា ខ្ញុំសង្ឃឹមថា ដំណើរទស្សនកិច្វនេះនឹងធ្វើឱ្យកិច្ចសហប្រតិបត្តិការរវាងប្រទេសយើងទាំងពីរកាន់តែមានភាពស៊ីជម្រៅបន្ថែមទៀត នូវការធ្វើពិពិធកម្ម ដើម្បីគ្រប់គ្រងផលប្រយោជន៍រួមគ្នា ក្នុងនោះមានដូចជាបញ្ហាប្រឈមនៃសាកលភាវូបនីយកម្មដែលមានការផ្លាស់ប្តូរ និងកំពុងជួបប្រទះនាពេលបច្ចុប្បន្ន ។ វានឹងអនុញ្ញាតឱ្យយើងពិនិត្យមើលនូវមធ្យោបាយ ដែល យើងអាចប្រើប្រាស់រួមគ្នា ដើម្បីពង្រឹងសណ្តាប់ធ្នាប់សកល ដែលផ្អែកលើវិធានច្បាប់ ដែលនឹងអនុញ្ញាតដល់ការធានានូវ អធិបតេយ្យភាព និងពោរពេញទៅដោយឯករាជ្យ នៃរដ្ឋទាំងអស់។ ខ្ញុំសូម ឯកឧត្តម នាយ រដ្ឋមន្ត្រី ទទួលនូវការគោរពអំពីខ្ញុំ។
បន្ថែមពីលើខ្លឹមសារខាងលើ លោកប្រធានាធិបតីបារាំងក៏បានសរសេរផ្ទាល់ដៃនូវឃ្លា ដែលផ្ញើនូវ ការនឹករលឹកដល់សម្តេចតេជោ ហ៊ុន សែន អតីតនាយករដ្ឋមន្រ្តីកម្ពុជាផងដែរ ដោយឃ្លានោះ បានលើកឡើងថា សូមមេត្តាពាំនាំការគោរពនឹករលឹកជូនចំពោះលោកឪពុករបស់ ឯកឧត្តមដែលជាមិត្តសម្លាញ់របស់ខ្ញុំ៕
