មន្ត្រីសេតវិមានបាននិយាយ កាលពីថ្ងៃព្រហស្បតិ៍ថា ប្រទេសរុស្ស៊ីបានបាញ់មីស៊ីលផ្លោងរបស់កូរ៉េខាងជើង ទៅកាន់ប្រទេសអ៊ុយក្រែន ។
ហើយឥឡូវនេះរុស្ស៊ី កំពុងស្វែងរកទិញមីស៊ីលផ្លោងរយៈចម្ងាយជិត ពីប្រទេសអ៊ីរ៉ង់បន្ថែមទៀត ខណៈដែលទីក្រុងមូស្គូ កំពុងប្រកាសបំពេញបន្ថែម នូវអាវុធដែលបាត់បង់របស់ខ្លួន។
អ្នកនាំពាក្យសន្តិសុខជាតិរបស់សេតវិមាន លោក John Kirby បាននិយាយថា កូរ៉េខាងជើងបានផ្តល់ឱ្យរុស្ស៊ីនូវកាំជ្រួចមីស៊ីលផ្លោង ។
ហើយសហរដ្ឋអាមេរិករំពឹងថា មីស៊ីលបន្ថែមដែលផ្គត់ផ្គង់ដោយក្រុងព្យុងយ៉ាង នឹងត្រូវប្រើប្រាស់ដើម្បីកំណត់គោលដៅហេដ្ឋារចនាសម្ព័ន្ធស៊ីវិលរបស់អ៊ុយក្រែន និងសម្លាប់ប្រជាជនស្លូតត្រង់ជាច្រើននាក់។
ទោះជាយ៉ាងណា លោក John Kirby បានលើកឡើងពីការស៊ើបការណ៍សម្ងាត់ ប៉ុន្តែដោយមិនបានបញ្ជាក់លម្អិតបន្ថែមទៀត លោកបាននិយាយថា យោធារុស្ស៊ីបានបាញ់បង្ហោះយ៉ាងហោចណាស់មីស៊ីលផ្លោងមួយគ្រាប់ចូលទៅក្នុងប្រទេសអ៊ុយក្រែនកាលពីថ្ងៃសៅរ៍ ហើយវាបានចុះចតនៅវាលបើកចំហក្នុងតំបន់ Zaporizhzhia។
គួរជម្រាបថា សហរដ្ឋអាមេរិកធ្លាប់បានលាតត្រដាងពីការប្រគល់គ្រឿងបរិក្ខារយោធា និងអាវុធរបស់កូរ៉េខាងជើងទៅឲ្យរុស្ស៊ីសម្រាប់ការឈ្លានពានរបស់ខ្លួននៅអ៊ុយក្រែន។
ប៉ុន្តែនេះជាលើកដំបូងដែលមន្ត្រីអាមេរិកបាននិយាយជាសាធារណៈអំពីការប្រើប្រាស់មីស៊ីលរបស់កូរ៉េខាងជើងនៅក្នុងសង្គ្រាមដែលបានចាប់ផ្តើមនៅក្នុងខែកុម្ភៈឆ្នាំ 2022។
យ៉ាងណាមិញ នៅមិនទាន់មានការចេញឆ្លើយបញ្ជាក់ចំពោះការលើកឡើងនេះទៅឡើយពីរដ្ឋាភិបាលក្រុងមូស្គូ៕