ក្រសួងសុខភាព របស់ដែនដីបាននិយាយកាលពីថ្ងៃសៅរ៍ថា យ៉ាងហោចណាស់ជនជាតិប៉ាឡេស្ទីន 174 នាក់បានស្លាប់ និង310 នាក់ផ្សេងទៀតបានរងរបួសក្នុងរយៈពេល 24 ម៉ោងចុងក្រោយនេះ។ ខណៈដែលកងទ័ពអ៊ីស្រាអែល បន្តការវាយលុកលើតំបន់ហ្គាហ្សាស្ទ្រីប ដែលត្រូវបានឡោមព័ទ្ធ។
ក្រសួងបាននិយាយ នៅក្នុងសេចក្តីថ្លែងការណ៍មួយថា “ការកាន់កាប់របស់អ៊ីស្រាអែល បានប្រព្រឹត្តការសម្លាប់រង្គាលចំនួន18 ប្រឆាំងនឹងគ្រួសារ នៅតំបន់ហ្គាហ្សាស្ទ្រីប ដោយបានធ្វើឱ្យទុក្ករបុគ្គល 174 នាក់ និង 310 នាក់បានរងរបួសក្នុងរយៈពេល 24 ម៉ោងកន្លងមក” ។
សេចក្តីថ្លែងការណ៍បាននិយាយថា “មនុស្សជាច្រើននៅតែជាប់នៅក្រោមគំនរបាក់បែក និងនៅតាមដងផ្លូវ ខណៈដែលអ្នកជួយសង្គ្រោះមិនអាចទៅដល់ពួកគេ”។
ក្រសួងបាននិយាយថា ជាមួយនឹងការបាត់បង់ជីវិតចុងក្រោយរបស់ប៉ាឡេស្ទីន ចំនួនអ្នកស្លាប់ពីការវាយប្រហារដែលកំពុងបន្តរបស់អ៊ីស្រាអែល លើតំបន់ហ្គាហ្សាចាប់តាំងពីថ្ងៃទី 7 ខែតុលា បានកើនឡើងដល់ 26,257 នាក់ និង64,797 នាក់ផ្សេងទៀតបានរងរបួស។
អ៊ីស្រាអែលបានវាយលុក តំបន់ហ្គាហ្សាស្ទ្រីប ចាប់តាំងពីការវាយប្រហារឆ្លងព្រំដែនដោយក្រុមហាម៉ាសកាលពីថ្ងៃទី 7 ខែតុលា ដែលទីក្រុង Tel Aviv និយាយថាបានសម្លាប់មនុស្សជិត 1,200 នាក់។
ការវាយលុករបស់អ៊ីស្រាអែល បានធ្វើឱ្យប្រជាជន 85% នៃប្រជាជននៅតំបន់ហ្គាហ្សាត្រូវផ្លាស់ទីលំនៅចំពេលមានការខ្វះខាតស្បៀងអាហារ ទឹកស្អាត និងថ្នាំពេទ្យ ។
ខណៈពេលដែល 60% នៃហេដ្ឋារចនាសម្ព័ន្ធនៃតំបន់នេះត្រូវបានខូចខាត ឬបំផ្លាញ៕