អ្នកគ្រប់គ្រងអង្គការ NASA លោក Bill Nelson បានធ្វើការអត្ថាធិប្បាយ កាលពីថ្ងៃព្រហស្បតិ៍ថារុស្ស៊ី កំពុងតែអភិវឌ្ឍ អាវុធនុយក្លេអ៊ែរក្នុងលំហ។
លោក Nelson ប្រាប់ទៅ CNN ថា “យើងបានសាងសង់ស្ថានីយអវកាសជាមួយគ្នា។
យើងដំណើរការវាជាមួយគ្នា ហើយយើងចង់ឲ្យវាបន្តទៅមុខ។
យើងមិនចង់បានជម្លោះ និងបញ្ហាអ្វី ក្រៅតែពីសន្តិភាពនោះទេ។
តាមការបញ្ជាក់ពី មន្ត្រីអាមេរិក, ប្រទេសរុស្ស៊ី កំពុងផលិតអាវុធនុយក្លេអ៊ែរបាញ់ទៅលំហ ។
ដើម្បីប្រឆាំងគោលដៅផ្កាយរណបរបស់ខ្លួន ដែលរឿងនេះ ពិតជាបង្កឲ្យមានក្តីបារម្ភ ផ្នែកសន្តិសុខខ្លាំងមែនទែន នៅក្នុងទីក្រុងវ៉ាស៊ីនតោន។
សារព័ត៌មាន NBC News អះអាងថា អាវុធនេះមិនទាន់រួចរាល់ទេ ប៉ុន្តែវាអាចធ្វើឲ្យបណ្តាញផ្កាយរណបដ៏សំខាន់របស់សហរដ្ឋអាមេរិក ស្ថិតក្នុងគ្រោះថ្នាក់។
ហើយជំរុញឲ្យប្រធានគណកម្មាធិការស៊ើបការណ៍សម្ងាត់សភាអាមេរិក អំពាវនាវដល់លោកប្រធានាធិបតី Joe Biden ឲ្យគិតគូរ
ចំពោះព័ត៌មានដែលគំរាមកំហែងសន្តិសុខជាតិដ៏ធ្ងន់ធ្ងរនេះ។
ជាច្រើនលើកច្រើនសារមកហើយ រុស្ស៊ី បានព្រមានប្រឆាំងនឹងការប្រកួតប្រជែងសព្វាវុធនៅក្នុងលំហ និងអះអាងថា ការប្រើប្រាស់របស់ខ្លួនគឺសម្រាប់តែគោលបំណងសន្តិភាពប៉ុណ្ណោះ ហើយបើយោងតាមការបញ្ជាក់ពី ប្រធានាធិបតី វ្ល៉ាឌីមៀរ ពូទីន, ទីក្រុងមូស្គូតែងតែប្រឆាំងនឹងការដាក់ពង្រាយអាវុធនុយក្លេអ៊ែរនៅក្នុងលំហជានិច្ច។
ទន្ទឹមនោះ ក្រសួងការបរទេសរុស្ស៊ីក៏ប្រកាសដែរថា សហរដ្ឋអាមេរិកនិងសម្ព័ន្ធមិត្ត កំពុងចាត់វិធានការដើម្បីដាក់អាវុធនៅក្នុងលំហ និងប្រើប្រាស់ទីអវកាសខាងក្រៅសម្រាប់ប្រតិបត្តិការប្រយុទ្ធ មិនត្រឹមតែសម្រាប់គោលបំណងការពារប៉ុណ្ណោះទេ។
ប្រទេសលោកខាងលិចបន្តចាត់ទុកលំហអាកាសជាសង្វៀនថ្មីនៃការប្រជែងគ្នា និងជម្លោះរវាងប្រទេសដែលរុស្ស៊ី និងចិនត្រូវបានគេកំណត់ថាជាគូប្រជែងដ៏សំខាន់។
គួរបញ្ជាក់ថា អាមេរិក រុស្ស៊ី និងចិន សុទ្ធជាប្រទេសមានសមត្ថភាពវាយប្រហារផ្កាយរណបជុំវិញពិភពលោក ប៉ុន្តែតាមទ្រឹស្តី ពួកគេមិនអាចប្រើអាវុធនុយក្លេអ៊ែរនៅទីនោះបានឡើយ។
ប្រទេសទាំង៣ គឺហត្ថលេខីនៃសន្ធិសញ្ញាអវកាសខាងក្រៅឆ្នាំ១៩៦៧ ដែលហាមឃាត់ប្រទេសណាមួយពីការបញ្ជូនវត្ថុមានផ្ទុកអាវុធនុយក្លេអ៊ែរឬប្រភេទអាវុធប្រល័យលោក ចូលទៅក្នុងគន្លងអវកាស៕