សមត្ថកិច្ចរុស្សី ចាប់ខ្លួនបុរសកូរ៉េខាងត្បូងម្នាក់ ពីបទចារកម្ម!

យោងតាមប្រព័ន្ធផ្សព្វផ្សាយ រដ្ឋរុស្ស៊ីបានឲ្យដឹងថា បុរសជនជាតិកូរ៉េខាងត្បូងម្នាក់ ត្រូវបានចាប់ឃុំខ្លួនក្នុងប្រទេសរុស្សី ពីបទ(ចារកម្ម)។

ក្រសួងការបរទេសកូរ៉េខាងត្បូងក៏បានបញ្ជាក់ពីការចាប់ខ្លួននេះផងដែរ ។
ដោយនិយាយថា ពួកគេកំពុងព្យាយាមផ្តល់ការគាំទ្រផ្នែកកុងស៊ុល។

ទីភ្នាក់ងាររដ្ឋ Tass បានរាយការណ៍ថា លោក Baek Won-soon ត្រូវបានចាប់ខ្លួននៅទីក្រុង Vladivostok ភាគខាងកើតប្រទេសរុស្ស៊ីនៅដើមឆ្នាំ ហើយឥឡូវនេះកំពុងស្ថិតនៅក្នុងពន្ធនាគារទីក្រុងម៉ូស្គូ។

យ៉ាងណាមិញ គេដឹងតិចតួចអំពីករណីរបស់លោក Baek ដោយក្រសួងការបរទេសកូរ៉េខាងត្បូងបាននិយាយថា “ព័ត៌មានលម្អិត” ស្ថិតនៅក្រោមការស៊ើបអង្កេត ហើយ “វាពិបាកក្នុងការធ្វើអត្ថាធិប្បាយ” ។

ប៉ុន្តែប្រព័ន្ធផ្សព្វផ្សាយរដ្ឋរុស្ស៊ី Tass បានដកស្រង់សម្តីមន្ត្រីដែលមិនបញ្ចេញឈ្មោះនៅក្នុងរបាយការណ៍របស់ពួកគេដោយនិយាយថា លោក Baek ត្រូវបានគេចោទប្រកាន់ថាបានបញ្ជូនព័ត៌មាន “បង្កើតអាថ៌កំបាំងរដ្ឋដល់សេវាចារកម្មបរទេស” ។

ដោយឡែក ប្រភពអនាមិកមួយនៅតំបន់ភាគខាងកើតឆ្ងាយរបស់រុស្ស៊ី ដែលអះអាងថាស្គាល់លោក Baek បានប្រាប់ BBC ថា លោក Baek បានជួយដល់ពលករកូរ៉េខាងជើងដែលកំពុងធ្វើការនៅប្រទេសរុស្ស៊ី និងជួយពួកគេឱ្យរួចខ្លួន។

យ៉ុនហាប់ ដែលជាភ្នាក់ងាររបស់កូរ៉េខាងត្បូងកំពុងរាយការណ៍ថាលោក Baek ត្រូវបានចាប់ខ្លួនដោយសេវាសន្តិសុខសហព័ន្ធរបស់រុស្ស៊ីកាលពីខែមករា បន្ទាប់ពីបានមកដល់ទីក្រុង Vladivostok ពីប្រទេសចិន។

គួរជម្រាបថា ការឃុំខ្លួនលោក Baek គឺជាការចាប់ខ្លួនជនបរទេសជាបន្តបន្ទាប់ ដែលធ្វើឡើងដោយអាជ្ញាធររុស្ស៊ី ចាប់តាំងពីសង្គ្រាមនៅអ៊ុយក្រែនបានចាប់ផ្តើមកាលពីពីរឆ្នាំមុន។
ទីក្រុងមូស្គូត្រូវបានចោទប្រកាន់ពីបទចាប់ខ្លួនជនជាតិរបស់ប្រទេសដទៃ ដើម្បីប្រើប្រាស់ជាបន្ទះឈីបចរចានយោបាយ និងសម្រាប់ការផ្លាស់ប្តូរអ្នកទោស៕