ក្រសួងសុខភាព របស់ដែនដីបាននិយាយកាលពីថ្ងៃសៅរ៍ថា ការវាយបក របស់អ៊ីស្រាអែល មកលើតំបន់ហ្គាហ្សា ចាប់តាំងពីថ្ងៃទី០៧ ខែតុលា ឆ្នាំ២០២៣។
រហូតពេលនេះ បណ្ដាលឱ្យប្រជាជនប៉ាឡេស្ទីន ស្លាប់ចំនួន៣២.១៤២ នាក់ និងរបួស៧៤.៤១២នាក់ ជនរងគ្រោះភាគច្រើនជាស្ដ្រីនិងកុមារ។
ក្រសួងសុខភាពបន្តថា ការវាយប្រហារ ពីសំណាក់អ៊ីស្រាអែល ក្នុងរយៈពេល 24 ម៉ោងចុងក្រោយនេះ បណ្ដាលឱ្យស្លាប់៧២នាក់ និងរបួស១១៤នាក់។
គួរម្លឹកថាៈ អ៊ីស្រាអែល បានវាយលុកតំបន់ហ្គាហ្សាស្ទ្រីប ចាប់តាំងពីមានការវាយប្រហារឆ្លងព្រំដែនដោយក្រុមហាម៉ាស់ ដែលទីក្រុង Tel Aviv បាននិយាយថា បានសម្លាប់មនុស្សជិត1,200 នាក់។
សង្គ្រាមអ៊ីស្រាអែល លើតំបន់ហ្គាហ្សា បានរុញច្រានប្រជាជន 85% នៃទឹកដីឱ្យផ្លាស់ទីលំនៅខាងក្នុងចំពេលមានការខ្វះខាតស្បៀងអាហារ ទឹកស្អាត និងថ្នាំពេទ្យ ខណៈដែល 60% នៃហេដ្ឋារចនាសម្ព័ន្ធនៃតំបន់ជុំវិញត្រូវបានខូចខាត ឬបំផ្លាញ នេះបើយោងតាមអង្គការសហប្រជាជាតិ។
អ៊ីស្រាអែល ត្រូវចោទប្រកាន់ពីបទប្រល័យពូជសាសន៍នៅតុលាការយុត្តិធម៌អន្តរជាតិ។
សេចក្តីសម្រេចបណ្តោះអាសន្នក្នុងខែមករាបានបញ្ជាឱ្យទីក្រុង Tel Aviv បញ្ឈប់សកម្មភាពប្រល័យពូជសាសន៍ និងចាត់វិធានការដើម្បីធានាថាជំនួយមនុស្សធម៌ត្រូវបានផ្តល់ជូនដល់ជនស៊ីវិលនៅតំបន់ហ្គាហ្សា៕