ក្រុមហ៊ុនបច្ចេកវិទ្យយក្ស Google បានបញ្ឈប់បុគ្គលិកចំនួន២៨នាក់..!។
ក្រោយពួកគេ ចូលរួមធ្វើបាតុកម្មតវ៉ាអង្គុយរយៈពេល 10 ម៉ោងនៅការិយាល័យក្នុងរដ្ឋកាលីហ្វ័រញ៉ា និងទីក្រុងញូវយ៉ក ។
ដោយតវ៉ាចំពោះទំនាក់ទំនង របស់ក្រុមហ៊ុន ជាមួយអ៊ីស្រាអែល។
ការឆ្លើយតបទៅនឹងការតវ៉ាកាលពីថ្ងៃអង្គារ ដែលដឹកនាំដោយក្រុមមួយហៅថា No Tech For Apartheid ប្រឆាំងនឹងគម្រោង Nimbus ។
ដែលជាកិច្ចសន្យាលើពពកតម្លៃ 1.2 ពាន់លានដុល្លារ ជាមួយអ៊ីស្រាអែល ក្រុមហ៊ុន Google កាលពីថ្ងៃពុធ បានបណ្តេញបុគ្គលិក 28 នាក់ដែលត្រូវបានចោទប្រកាន់ថាបានចូលរួមក្នុងការតវ៉ា។
លោក Chris Rackow ប្រធានផ្នែកសន្តិសុខសកលរបស់ Google បានសង្កត់ធ្ងន់លើគោលការណ៍មិនអត់ឱនរបស់ក្រុមហ៊ុនចំពោះអាកប្បកិរិយារបស់អ្នកតវ៉ានៅក្នុងអនុស្សរណៈ ដែលបានផ្ញើទៅកាន់បុគ្គលិកទាំងអស់ដែលបានផ្សព្វផ្សាយនៅលើប្រព័ន្ធផ្សព្វផ្សាយសង្គម។
លោកបានសង្កត់ធ្ងន់ថា”អាកប្បកិរិយាបែបនេះ មិនមានកន្លែងធ្វើការរបស់យើងទេ ហើយយើងនឹងមិនអត់ឱនចំពោះវាឡើយ”។
ប្រធានផ្នែកសន្តិសុខរូបនេះបានបន្ថែមថា “បន្ទាប់ពីការស៊ើបអង្កេតថ្ងៃនេះ យើងបានបញ្ឈប់ការងាររបស់និយោជិតចំនួន 28 នាក់ដែលបានរកឃើញថាមានជាប់ពាក់ព័ន្ធ។ ហើយយើងនឹងបន្តស៊ើបអង្កេត និងចាត់វិធានការតាមការចាំបាច់”។
ការតវ៉ានេះ ធ្វើឡើងស្របពេលជាមួយនឹងការបន្តវាយលុករបស់អ៊ីស្រាអែល លើតំបន់ហ្គាហ្សាស្ទ្រីប ដែលចាប់តាំងពីថ្ងៃទី 7 ខែតុលាកន្លងទៅ បានឆក់យកជីវិតមនុស្សជាង 33,800 នាក់។
គួរជម្រាបថា គម្រោង Nimbus រួមមានប្រព័ន្ធសិក្សាលើពពក និងម៉ាស៊ីន ។
ដែលអនុញ្ញាតឱ្យរក្សាទុកទិន្នន័យ ការប្រមូល ការវិភាគ គំនូរ និងការកំណត់អត្តសញ្ញាណលក្ខណៈពិសេសពីទិន្នន័យ និងការព្យាករណ៍នៃទិន្នន័យ និងគំនូរសក្តានុពល។
កិច្ចសន្យាតម្លៃ 1.2 ពាន់លានដុល្លារសម្រាប់គម្រោងនេះត្រូវបានចុះហត្ថលេខាក្នុងខែមេសា ឆ្នាំ 2021 រវាងអ៊ីស្រាអែល និង Google និង Amazon។
ប្រព័ន្ធនេះអាចប្រមូលប្រភពទិន្នន័យទាំងអស់ដែលផ្តល់ដោយអ៊ីស្រាអែល និងយោធារបស់ខ្លួន រួមទាំងមូលដ្ឋានទិន្នន័យ ធនធាន និងសូម្បីតែប្រភពសង្កេតផ្ទាល់ ដូចជាកាមេរ៉ាតាមដងផ្លូវ និងយន្តហោះគ្មានមនុស្សបើកជាដើម។
ទោះជាយ៉ាងណា ក្រុមអ្នករិះគន់បានអះអាងថា គម្រោងនេះអាចជួយអ៊ីស្រាអែលបន្តនូវប្រព័ន្ធនៃការគាបសង្កត់ ការត្រួតត្រា និងការបែងចែកប្រជាជនប៉ាឡេស្ទីនដែលមានលក្ខណៈដូចអាផាថេត៕