ក្រុមមន្ត្រីបាននិយាយ កាលពីថ្ងៃអង្គារថា ភ្លៀងធ្លាក់ និងទឹកជំនន់នៅក្នុងប្រទេសកេនយ៉ា បានឆក់យកជីវិតមនុស្សចំនួន 66នាក់ទៀត ក្នុងរយៈពេល 24 ម៉ោងចុងក្រោយនេះ ។
ដែលជំរុញឱ្យចំនួនអ្នកស្លាប់កើនឡើងដល់ 169នាក់ចាប់តាំងពីថ្ងៃទី 1 ខែមីនា ជាមួយនឹងមនុស្ស 91 នាក់នៅតែបាត់ខ្លួន។
ថ្លែងនៅក្នុងសន្និសីទសារព័ត៌មានមួយ អ្នកនាំពាក្យរដ្ឋាភិបាលកេនយ៉ា លោក Isaac Mwaura បាននិយាយថា ការស្លាប់កាលពីថ្ងៃអង្គារ ពីការរអិលបាក់ដី ដែលបានលេបត្របាក់ភូមិនានា ដែលបានសម្លាប់មនុស្ស 45 នាក់ បានជំរុញឱ្យចំនួនអ្នកស្លាប់កើនឡើងដល់ 169 នាក់។
លោកបានបន្ថែមថា “ក្នុងរយៈពេល 24 ម៉ោងកន្លងមក យើងបានបាត់បង់មនុស្ស 66 នាក់នៅទូទាំងប្រទេស ហើយក្នុងនោះមានមនុស្សពេញវ័យ 60 នាក់ និងកុមារ6នាក់”។
លោក Mwaura បានកត់សម្គាល់ថា “ទឹកជំនន់បាននាំឱ្យមានការផ្លាស់ទីលំនៅរបស់ប្រជាជនកេនយ៉ានៅក្នុង 30,214 គ្រួសារដែលរួមមានមនុស្សប្រហែល 190,942” ដោយបន្ថែមថារដ្ឋធានីកេនយ៉ាគឺជាប្រទេសរងគ្រោះធ្ងន់ធ្ងរបំផុតដោយការផ្លាស់ទីលំនៅ។
ដើម្បីឆ្លើយតបទៅនឹងស្ថានការណ៍កាន់តែតានតឹង រដ្ឋាភិបាលកេនយ៉ាបានប្រកាសថា ខ្លួននឹងបង់ថ្លៃមន្ទីរពេទ្យទាំងអស់សម្រាប់អ្នកដែលរងផលប៉ះពាល់ដោយទឹកជំនន់ ជាពិសេសអ្នកដែលរងផលប៉ះពាល់ដោយការរអិលបាក់ដីកាលពីថ្ងៃអង្គារ ។
ដើម្បីបន្ធូរបន្ថយបន្ទុកហិរញ្ញវត្ថុដល់គ្រួសារដែលជួបការខាតបង់ និងការផ្លាស់ទីលំនៅ។
ទឹកជំនន់ដែលបង្កឡើងដោយភ្លៀងធ្លាក់ខ្លាំង និងទឹកទន្លេហូរហៀរ បានជន់លិចផ្ទះសម្បែង បំផ្លាញហេដ្ឋារចនាសម្ព័ន្ធ និងរំខានដល់សេវាសំខាន់ៗ។
រដ្ឋាភិបាលកេនយ៉ា សហការជាមួយអង្គការមនុស្សធម៌ និងអាជ្ញាធរមូលដ្ឋាន បានកៀងគរធនធាន ដើម្បីផ្តល់ជំនួយសង្គ្រោះបន្ទាន់ ដល់អ្នកដែលរងផលប៉ះពាល់ដោយទឹកជំនន់។
ប្រធានាធិបតីកេនយ៉ា លោក William Ruto បានកោះប្រជុំគណៈរដ្ឋមន្ត្រីពិសេសមួយកាលពីថ្ងៃអង្គារ ។
ដើម្បីទប់ទល់នឹងទឹកជំនន់ដ៏សាហាវដែលបានឆក់យកជីវិតមនុស្សជិត ១៧០ នាក់។
នៅក្នុងសេចក្តីថ្លែងការណ៍មួយកាលពីថ្ងៃអង្គារ លោក Moussa Faki Mahamat ប្រធានគណៈកម្មការសហភាពអាហ្រ្វិក បានសម្តែងការរំលែកទុក្ខដ៏ក្រៀមក្រំ និងសាមគ្គីភាពជាមួយគ្រួសារដែលរងផលប៉ះពាល់ និងប្រជាជនកេនយ៉ា បន្ទាប់ពីគ្រោះមហន្តរាយទឹកជំនន់បានធ្វើឱ្យមានការបំផ្លិចបំផ្លាញនៅទូទាំងប្រទេស។
គួរជម្រាបថា មនុស្សជាង 40 នាក់ត្រូវបានសម្លាប់កាលពីថ្ងៃចន្ទបន្ទាប់ពីការបាក់ទំនប់វារីអគ្គិសនីនៅតំបន់ Nakuru ក្នុងប្រទេសកេនយ៉ា។
ឧបទ្ទវហេតុនេះបានកើតឡើងនៅ Mai Mahiu ខោនធី Nakuru ដែលមានចម្ងាយប្រហែល 60 គីឡូម៉ែត្រ (37 ម៉ាយ) ភាគពាយព្យនៃរដ្ឋធានីណៃរ៉ូប៊ី៕