ប្រទេសកូរ៉េខាងត្បូង កាលពីថ្ងៃព្រហស្បតិ៍ បាននិយាយថា ខ្លួននឹងពិចារណាឡើងវិញ នូវបញ្ហាការផ្គត់ផ្គង់អាវុធដល់អ៊ុយក្រែន បន្ទាប់ពីគូប្រជែងកូរ៉េខាងជើង និងរុស្ស៊ី បានចុះហត្ថលេខា លើសន្ធិសញ្ញាភាពជាដៃគូថ្មីមួយ។
-នេះយោងតាមទីភ្នាក់ងារសារព័ត៌មាន Yonhap។
មន្ត្រីប្រធានាធិបតី បាននិយាយថា ទីក្រុងសេអ៊ូល នឹងរក្សាភាពមិនច្បាស់លាស់ជាយុទ្ធសាស្ត្រទាក់ទងនឹងប្រភេទអាវុធ។
មន្ត្រីរូបនេះបានប្រាប់អ្នកសារព័ត៌មានថា វិធានការជាក់លាក់នឹងត្រូវបានបង្ហាញនៅពេលក្រោយ ហើយវានឹងគួរឱ្យចាប់អារម្មណ៍ក្នុងការមើលពីរបៀបដែលរុស្ស៊ីឆ្លើយតប ជាជាងការបង្ហាញពីផែនការរបស់យើងជាមុន។
ប្រធានាធិបតីរុស្ស៊ី លោក វ្ល៉ាឌីមៀ ពូទីន បានជួបមេដឹកនាំកូរ៉េខាងជើង លោក គីម ជុងអ៊ុន នៅសប្តាហ៍នេះ ហើយប្រទេសទាំងពីរ បានចុះហត្ថលេខាលើសន្ធិសញ្ញា ។
ដែលពាក់ព័ន្ធនឹងការសន្យាទៅវិញទៅមក ដើម្បីផ្តល់ជំនួយយោធាភ្លាមៗ ប្រសិនបើនរណាម្នាក់ក្នុងចំណោមពួកគេត្រូវបានវាយប្រហារ។
ទីប្រឹក្សាសន្តិសុខជាតិលោក Chang Ho-jin ក៏បានសម្តែងការសោកស្តាយ ចំពោះសន្ធិសញ្ញានេះផងដែរ ។
ដោយនិយាយថា កិច្ចសហប្រតិបត្តិការណាដែលជួយដល់ការបង្កើនកម្លាំងយោធារបស់កូរ៉េខាងជើងដោយផ្ទាល់ ឬដោយប្រយោល គឺជាការរំលោភលើសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ហើយបានប្តេជ្ញាចាត់វិធានការដែលត្រូវគ្នា។
លោក Chang បាននិយាយថា “យើងគ្រោងនឹងពិចារណាឡើងវិញនូវបញ្ហានៃការគាំទ្រសព្វាវុធដល់អ៊ុយក្រែន” ដោយស្នើឱ្យមានការផ្លាស់ប្តូរនៅក្នុងគោលនយោបាយរបស់កូរ៉េខាងត្បូងក្នុងការមិនផ្តល់ជំនួយដ៍សាហាវដល់អ៊ុយក្រែន ដែលរុស្ស៊ីបន្ត “ប្រតិបត្តិការយោធាពិសេស” ចាប់តាំងពីខែកុម្ភៈ ឆ្នាំ 2022។
មន្ត្រីរូបនេះបានបន្ថែមថា កូរ៉េខាងត្បូង ដែលជាសម្ព័ន្ធមិត្តរបស់លោកខាងលិច ក៏នឹងដាក់ទណ្ឌកម្មបន្ថែមលើនាវាចំនួនបួន អង្គការចំនួនប្រាំ និងបុគ្គលចំនួន 8 នាក់ ដែលពាក់ព័ន្ធនឹងការផ្ទេរអាវុធ និងប្រេងរវាងរុស្ស៊ី និងកូរ៉េខាងជើង៕