មនុស្ស៤៦នាក់បានស្លាប់ ក្នុងនោះក៏មានភេរវករ១២ នាក់ផងដែរ។
ក្រោយប៉ះទង្គិចគ្នា ជាច្រើនម៉ោង នៅភាគនិរតី នៃប្រទេសប៉ាគីស្ថាន…!។
-នេះបើយោងតាមមន្ត្រី និងប្រព័ន្ធផ្សព្វផ្សាយក្នុងស្រុក បានរាយការណ៍ កាលពីថ្ងៃចន្ទ។
ជនសង្ស័យជាសកម្មប្រយុទ្ធ បានសម្លាប់អ្នកដំណើរ២៣នាក់ នៅក្នុងខេត្ត Balochistan ភាគនិរតីកាលពីព្រឹកថ្ងៃច័ន្ទ។
ហេតុការណ៍នេះ បានកើតឡើងនៅជិតស្រុក Musakhel ដោយពួកសកម្មប្រយុទ្ធ បិទផ្លូវនិងឃាត់រថយន្តជាច្រើនគ្រឿង ដែលផ្ទុកអ្នកដំណើរ។
លោក Sarfraz Bugti នាយករដ្ឋមន្ដ្រី Balochistan បានបញ្ជាក់អំពីករណីនេះ ដោយនិយាយថា ភេរវករ បានកំណត់គោលដៅលើជនស៊ីវិល ហើយត្រូវតាមចាប់ពួកគេយកមកកាត់ទោស.!។
លោក Shahid Rind អ្នកនាំពាក្យរដ្ឋាភិបាល Balochistan បានប្រាប់អ្នកយកព័ត៌មានថា ភេរវករបានឆែកឆេររថយន្តក្រុង និងឡានដឹកទំនិញ ។
ហើយពិនិត្យមើលអត្តសញ្ញាណអ្នកដំណើរមុនពេលសម្លាប់។
អ្នកស្លាប់ត្រូវបានគេនិយាយថា មកពីខេត្ត Punjab ភាគឦសាន។
ទន្ទឹមនឹងនេះដែរ មនុស្ស១០ នាក់ផ្សេងទៀត រួមទាំងបុគ្គលិកសន្តិសុខ ៥នាក់ និងជាពលរដ្ឋជាច្រើនត្រូវបានសម្លាប់ នៅក្នុងការប៉ះទង្គិចគ្នាមួយយប់រវាងក្រុមសកម្មប្រយុទ្ធ និងប៉ូលីស នៅលើផ្លូវជាតិក្នុងសង្កាត់ Balochistan នៃស្រុក Qalat មេប៉ូលីសក្រុង Qalat លោក Dostin Dashti បានប្រាប់អ្នកយកព័ត៌មាន។
ប៉ូលីសបាននិយាយថា រហូតមកដល់ពេលនេះ អ្នកវាយប្រហារចំនួន ១២នាក់ត្រូវបានសម្លាប់ និងជាច្រើននាក់ទៀតរងរបួសនៅក្នុងការប៉ះទង្គិចគ្នា។
ដោយឡែកក្រុមជនប្រដាប់អាវុធបានសម្រុកចូលមកត្រួតត្រាប៉ុស្តិ៍ប៉ូលិសក្នុងស្រុក Mastung ក្នុងខេត្តអស់រយៈពេលជាច្រើនម៉ោង។
ពួកគេបានដុតបំផ្លាញភស្តុតាង និងរថយន្តជាច្រើនគ្រឿង ដែលចតនៅខាងក្នុងប៉ុស្តិ៍ប៉ូលីស។
ប៉ូលីសបាននិយាយថា ពួកគេបានគ្រប់គ្រងស្ថានីយ៍ប៉ូលីស ឡើងវិញ ដោយបង្ខំឱ្យអ្នកវាយប្រហាររត់គេចខ្លួន។
ទោះបីជាយ៉ាងណាក៏ដោយ សាកសពបុរសមិនស្គាល់អត្តសញ្ញាណម្នាក់ ត្រូវបានគេរកឃើញ នៅខាងក្រៅប៉ុស្តិ៍ប៉ូលីស។
ទន្ទឹមនឹងនេះ ការបំផ្ទុះគ្រាប់បែកបានបំផ្លាញស្ពានផ្លូវដែកដ៏សំខាន់មួយនៅក្នុងស្រុក Bolan ដោយបានផ្អាកចរាចរណ៍ផ្លូវដែករវាង Balochistan និងខេត្តផ្សេងទៀត។
យ៉ាងណាមិញ គ្មានក្រុមណាមួយបានអះអាងទទួលខុសត្រូវចំពោះការវាយប្រហារនាពេលថ្មីៗនេះទេ។ ទោះបីជាយ៉ាងណាក៏ដោយ កងកម្លាំងសន្តិសុខបានចង្អុលដៃទៅកាន់ក្រុមផ្តាច់ខ្លួន Baloch ក្រៅច្បាប់ ដែលបានកំណត់គោលដៅជាយូរមកលើកងកម្លាំងសន្តិសុខ និងប្រជាជនមិនមែន Baloch នៃខេត្តនេះ៕