រដ្ឋមន្ត្រីក្រសួងមហាផ្ទៃលីបង់ បាននិយាយកាលពីថ្ងៃព្រហស្បតិ៍(ទី២៦ខែកញ្ញា)ថា ប្រជាជនស៊ីរី ប្រហែល 13,500 នាក់ បានចាកចេញពីប្រទេសលីបង់ ទៅកាន់ប្រទេសស៊ីរី ចាប់តាំងពីការវាយប្រហារ តាមអាកាសរបស់អ៊ីស្រាអែល កាលពីថ្ងៃចន្ទមក…!។
លោក Bassam Mawlawi បានប្រាប់សន្និសីទសារព័ត៌មាន នៅទីក្រុង Beirut ថា មានជនជាតិស៊ីរី 13,500 នាក់ ដែលបានចាកចេញពីប្រទេសលីបង់ ដើម្បីត្រឡប់ទៅប្រទេសស៊ីរី ។
ប្រទេសលីបង់ ទទួលជនភៀសខ្លួនស៊ីរីចំនួន 1.8 លាននាក់ ប្រហែល 900.000 នាក់ត្រូវបានចុះឈ្មោះជាមួយទីភ្នាក់ងារជនភៀសខ្លួនអង្គការសហប្រជាជាតិ (UNHCR)។
លោក Mawlawi បាននិយាយថា មនុស្សប្រហែល 70,100 នាក់បានភៀសខ្លួននៅក្នុងជម្រកចំនួន 533 ក្នុងប្រទេសលីបង់ ដោយសារការវាយប្រហាររបស់អ៊ីស្រាអែលដែលកំពុងបន្ត។
លោកបានបន្ថែមថា មានជម្រកផងដែរនៅក្នុងតំបន់ Bekaa នៅភាគខាងកើតប្រទេសលីបង់ដែលកំណត់សម្រាប់ជនជាតិស៊ីរី ។
អ៊ីស្រាអែល បានវាយលុកប្រទេសលីបង់ ចាប់តាំងពីព្រឹកថ្ងៃចន្ទ ដោយបានសម្លាប់មនុស្សយ៉ាងតិច ៦៤០នាក់ និងរបួសជាង ២.៥០០នាក់ផ្សេងទៀត នេះបើយោងតាមតួលេខ ដែលចេញផ្សាយដោយក្រសួងសុខាភិបាល។
សហរដ្ឋអាមេរិក សហភាពអឺរ៉ុប និងប្រទេសចំនួនប្រាំបួនផ្សេងទៀតបានអំពាវនាវឱ្យអ៊ីស្រាអែល និងក្រុមហេសបូឡាកាលពីល្ងាចថ្ងៃពុធឱ្យយល់ព្រមលើបទឈប់បាញ់រយៈពេល 21 ថ្ងៃ ចំពេលមានការកើនឡើងនៅក្នុងសង្គ្រាមឆ្លងព្រំដែនរបស់ពួកគេ។
ទោះជាយ៉ាងនេះក្តី នាយករដ្ឋមន្ត្រីអ៊ីស្រាអែល លោក Benjamin Netanyahu បានបដិសេធសេចក្តីរាយការណ៍របស់ប្រព័ន្ធផ្សព្វផ្សាយថា លោកបានយល់ព្រមចំពោះបទឈប់បាញ់។
ដែលបានស្នើឡើង ដោយនិយាយថា លោកបានបញ្ជាឱ្យកងទ័ពរបស់លោកបន្តវាយលុក ប្រទេសលីបង់ដោយកម្លាំងពេញលេញ។
នាយករដ្ឋមន្ត្រី ក៏បាននិយាយផងដែរថា សង្គ្រាមអ៊ីស្រាអែលនៅហ្គាហ្សានឹងបន្ត រហូតដល់គោលដៅទាំងអស់នៃសង្គ្រាមត្រូវបានសម្រេច។
ក្រុមហេសបូឡា និងអ៊ីស្រាអែលបានចូលរួមក្នុងការប៉ះទង្គិចគ្នាឆ្លងព្រំដែនចាប់តាំងពីការចាប់ផ្តើមនៃសង្រ្គាមរបស់អ៊ីស្រាអែលនៅលើតំបន់ហ្គាហ្សា ។
ដែលបានសម្លាប់មនុស្សជិត 41,500 នាក់ ដែលភាគច្រើនជាស្ត្រី និងកុមារ បន្ទាប់ពីការវាយប្រហារឆ្លងព្រំដែនដោយក្រុមហាម៉ាស់កាលពីថ្ងៃទី 7 ខែតុលា។
សហគមន៍អន្តរជាតិបានព្រមានប្រឆាំងនឹងការវាយប្រហារលើប្រទេសលីបង់ ខណៈពួកគេលើកឡើងពីទិដ្ឋភាពនៃការរីករាលដាលជម្លោះតំបន់ហ្គាហ្សា៕