មេដឹកនាំកម្ពុជា និងថៃ ឯកភាពបន្តពង្រឹងកិច្ចសហប្រតិបត្តិការទ្វេភាគីឱ្យកាន់តែប្រសើរឡើង!

(ឡាវ)៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកស្រី ផែថងថាន ស៊ីណាវ៉ាត្រា នាយករដ្ឋមន្ត្រីនៃប្រទេសថៃ ។

បានឯកភាពបន្តពង្រឹង និងកិច្ចសហប្រតិបត្តិការទ្វេភាគី ឱ្យកាន់តែខ្លាំងក្លាថែមទៀត ដើម្បីប្រយោជន៍សម្រាប់ប្រទេស និងប្រជាជន …!។

ក្នុងពេលអញ្ជើញចូលរួមកិច្ចប្រជុំកំពូលអាស៊ាន និងកិច្ចប្រជុំកំពូលពាក់ព័ន្ធនាទីរដ្ឋធានីវៀងចន្ទន៍ ប្រទេសឡាវ កាលពីល្ងាចថ្ងៃពុធ ទី៩ ខែតុលា ឆ្នាំ២០២៤។
សម្តេចធិបតី និងលោកស្រី ផែថងថាន បានឆ្លៀតជួបសម្តែងការគួរសម និងពិភាក្សាការងារជាមួយគ្នា ក្រោមបរិយាកាសដ៏ស្និទ្ធស្នាល…!។

ក្នុងនោះ លោកស្រីនាយករដ្ឋមន្ត្រីថៃ បានថ្លែងអំណរគុណសម្ដេចមហាបវរធិបតី ដែលបានផ្ញើសារ​អបអរ​សាទរលោកស្រី មុនគេបង្អស់នៅពេលលោកស្រីត្រូវបានជ្រើសតាំងជានាយករដ្ឋមន្ត្រី។
លោកស្រី នាយក​រដ្ឋមន្ត្រីថៃ បានកត់សម្គាល់ដោយក្តីរីករាយនូវភាពរីកចម្រើនថែមទៀតនៃទំនាក់ទំនង និងកិច្ចសហប្រតិបត្តិការ រវាងប្រទេសទាំងពីរ បន្ទាប់ពីដំណើរទស្សនកិច្ចផ្លូវការរបស់សម្ដេចមហាបវរធិបតីនៅប្រទេសថៃ កាលពីខែ​កុម្ភៈ ឆ្នាំ២០២៤។

សម្ដេចធិបតី បានវាយតម្លៃខ្ពស់ចំពោះវឌ្ឍនភាពនៃទំនាក់ទំនងកម្ពុជា-ថៃ ដែលត្រូវបានដំឡើង​ដល់​កម្រិត​ភាពជាដៃគូយុទ្ធសាស្ត្រក្នុងឆ្នាំ២០២៤នេះ។

សម្តេចធិបតី និងលោកស្រីនាយករដ្ឋមន្រ្តីថៃ បានពិភាក្សាអំពីការបន្តពង្រឹង និងពង្រីកកិច្ចសហប្រតិ​បត្តិ​ការទ្វេភាគី រួមមាន ការចាប់ផ្ដើមឡើងវិញនូវកិច្ចប្រជុំយន្តការទ្វេភាគីមួយចំនួន ការសិក្សាអំពីលទ្ធភាព​នៃការ​បង្កើត​តំបន់សេដ្ឋកិច្ចពិសេសបំពេញគ្នាទៅវិញទៅមក ការតភ្ជាប់រវាងប្រជាជន និងប្រជាជន វិស័យទេសចរណ៍ វិស័យការពារជាតិ និងសន្តិសុខជាដើម។

ថ្នាក់ដឹកនាំទាំងពីរបានឯកភាពបន្តពង្រឹង និងពង្រីកកិច្ចសហប្រតិបត្តិការទ្វេភាគីឱ្យកាន់តែខ្លាំងក្លា និងប្រគល់​ជូន​ក្រសួងការបរទេសនៃប្រទេសទាំងពីរ ដើម្បីសម្របសម្រួលកិច្ចពិភាក្សាបន្តពាក់ព័ន្ធប្រធានបទខាងលើ ព្រម​ទាំងរៀបចំឱ្យមានសកម្មភាពមួយចំនួន និងអបអរខួបលើកទី៧៥ នៃទំនាក់ទំនងការទូតកម្ពុជា-ថៃ នា​ឆ្នាំ២០២៥ខាងមុខ៕

Leave a Reply

Your email address will not be published. Required fields are marked *