(ភ្នំពេញ)៖ ក្រោយចេញ(វីដេអូ)សុំទោស ពីសំណាក់លោក លី សាម៉េត(ហៅគ្រូមា)ដោយរូបលោកបានទទួលស្គាល់កំហុសរបស់ខ្លួន។ ចំពោះការ(ឆបោក)ប្រាក់គេរាប់សែនដុល្លារ និងសុំពន្យារពេល ដើម្បីព្យាបាលជំងឺសិន រួចទើបប្រគល់ខ្លួនឱ្យសមត្ថកិច្ចតាមក្រោយ…!។
ឥឡូវនៅរសៀលទី០៤.១១.២០២៤ សម្ដេចតេជោ ហ៊ុន សែន ប្រធានព្រឹទ្ធសភានៃកម្ពុជា បានប្រកាសថា មិនមែនសុំទោសហើយរួចខ្លួននោះទេ.!។
ក្នុងនោះសម្ដេច ក៏បានស្នើឱ្យសមត្ថកិច្ចទៅនាំខ្លួនលោក លី សាម៉េត រួចបញ្ជូនទៅតុលាការ ដើម្បីកាត់ទោសតាមច្បាប់ទៀតផង…..!។
-សម្ដេចតេជោ បានលើកឡើងយ៉ាងដូច្នេះថា”ខ្ញុំសូមបញ្ជាក់ជូនថា មិនមែនដោយសារតែវីដេអូសារភាពកំហុស និង
សូមទោសមួយនេះ លី សាម៉េត ត្រូវបានរួចខ្លួននោះឡើយ។
ជំនួយការខ្ញុំម្នាក់ឈ្មោះ ដួង តារា ត្រូវបានឃាត់ខ្លួនរង់ចាំការកាត់ទោស
ដោយសារជាប់ពាក់ពន្ធ័ឆបោកជាមួយ លី សាម៉េត នេះ។
ពេលនេះ លី សាម៉េត ក្រោយពីរត់គេចខ្លួនបានបង្ហាញខ្លួន
ហើយសូមសមត្ថកិច្ចដែលជានគរបាល ឬកងរាជអាវុធហត្ថទៅនាំខ្លួន លី សាម៉េត បញ្ជូនទៅតុលាការដើម្បីកាត់ទោសតាមច្បាប់។
លី សាម៉េត បានសុំពេលព្យាបាលខ្លួននៅផ្ទះមុនពេលចូលខ្លួន
ឱ្យតុលាការកាត់ទោស មិនអាចធ្វើបែបនេះបានឡើយ
នគរបាលយុត្តិធម៌ត្រូវតែនាំខ្លួន លី សាម៉េត បញ្ជូនទៅតុលាការតាមនីតិវិធី។
ខ្ញុំសង្ឃឹមថា សមត្ថកិច្ចមិនបន្តឱ្យ លី សាម៉េត បានស្ថិតនៅក្រៅសំណាញ់ច្បាប់ទៀតទេ”។
-សូមរំលឹកថា កាលពីថ្ងៃទី០៧.១០.២០២៤ សម្ដេចតេជោ ហ៊ុន សែន បានទម្លាយថា អ្នកឧកញ៉ា លី សាម៉េត (ឆបោក)លុយគេជាច្រើននាក់ ក្នុងនោះក៏មានលោក កន សុកកាយ អភិបាលស្រុកល្វាឯម.ចំនួន៣០ម៉ឺនដុល្លារផងដែរ…!។
-ក្នុងពេលនោះសម្ដេចតេជោ ក៏បានលើកឡើងដែរថា”ដោយរឿងច្រើនពេកថ្ងៃនេះខ្ញុំសម្រេចចិត្តបង្ហោះសារទាក់ទងដល់
លោកលី សាម៉េត(ហៅគ្រូមា)។
លី សាម៉េត តែងប្រើឈ្មោះខ្ញុំដើរ
បោកប្រាស់គេ រហូតថាយកលុយដែលបោកប្រាស់បាន យកមកជូនខ្ញុំ
ទៀតផង ដោយប្រាប់គេថា ខ្លួនចេញចូលផ្ទះខ្ញុំ ក្នុងពេលណាក៏បានក្នុងពេលដែល លី សាម៉េត មិនដឹងថាផ្ទះខ្ញុំបែរមុខទៅខាងណាផង។
ឆ្នាំ២០២២ លី សាម៉េត បោកលុយឈ្មោះ សុខ ឡេង ១០លានដុល្លារថាយកមកឲ្យខ្ញុំ តែពេល សុខ ឡេងផ្តាំឲ្យសួរខ្ញុំតាមកូនចិញ្ចឹមខ្ញុំ ទ្រី សុខាទើបខ្ញុំដឹងក៏ទាមទារពី លី សាម៉េតប្រគល់ឲ្យ សុខ ឡេង វិញទាំងអស់ដោយពេលនោះយក លី សាម៉េត ទៅសួរចម្លើយ
និងប្រគល់ទទួលប្រាក់នៅស្នងការ
នគរបាលក្រុងភ្នំពេញ។
មុននេះប៉ុន្មានថ្ងៃ ខ្ញុំបានប្រាប់ទៅ
លី សាម៉េត ឲ្យសងលុយទៅ មួង ឃីម ចំនួន២៣មុឺនដុល្លារ ក្រោយមួង ឃីម បញ្ជូនសារជាវីដេអូមកខ្ញុំអមដោយសារសម្លេងឆ្លងឆ្លើយគ្នា(បានសងរួចហើយ)។
ថ្ងៃនេះខ្ញុំទទួលវីដេអូ ពីលោក
កន សុខកាយ ថា លី សាម៉េត បានយកប្រាក់ពីគាត់ចំនួន៣០មុឺនដុល្លារ ដើម្បីរត់ការបាន
តំណែងជាអភិបាលក្រុងអរិយក្សត្រ។
ក្នុងមុខតំណែង ជារដ្ឋមន្ត្រី៦ឆ្នាំជា
នាយករដ្ឋមន្ត្រី៣៨ឆ្នាំ និងពេលនេះជាប្រធានព្រឹទ្ធសភា អមដោយអំណាច
ជាប្រមុខរដ្ឋស្តីទី ក្នុងពេលអវត្តមាន
ព្រះមហាក្សត្រ ខ្ញុំធ្លាប់ចុះហត្ថលេខា
តែងតាំងនិងដំឡើងសក្តិមន្ត្រីរាប់មុឺន
នាក់ ទាំងសុីវិលនិងកងកម្លាំងប្រដាប់អាវុធ ខ្ញុំមិនដែលទទួលយកអន្តរាគមន៍ពីអ្នកណានោះឡើយ មិនថាតាមការស្នើសុំ ឬតាមសំណូកណាមួយនោះឡើយ។
ផ្ទុយទៅវិញមន្ត្រីមួយចំនួន
ទទួលបានការតែងតាំង ហើយទទួលបានការជួយពីខ្ញុំថែមទៀតដើម្បីឲ្យពួកគាត់មានមធ្យោបាយធ្វើការ។
ករណី លី សាម៉េត អាចនៅមានមនុស្សច្រើនទៀត ដែលចាញ់បោកគាត់ក្រោមរូបភាព យកឈ្មោះខ្ញុំទៅប្រើ។
ដើម្បីជម្រះបញ្ជីមួយនេះ តាមរបៀប
ពន្លត់ភ្លើង ជាជាងអង្គុយបក់ផ្សែងខ្ញុំ
សូមស្នើ៖
១.រដ្ឋមន្ត្រីក្រសួងយុត្តិធម៌ ធ្វើការជាមួយតុលាការ ដើម្បីចេញដីកា
ការពារទ្រព្យសម្បត្តិ លី សាម៉េតដើម្បីទុកសងដល់អ្នកចាញ់បោក លី សាម៉េត ។
២.អ្នកចាញ់បោក លី សាម៉េតទាំងអស់ដាក់ពាក្យប្តឹង ឬទាមទារសំណងទៅកាន់មេធាវីសម្តេចតេជោ។
៣.ឯកឧត្តម គី តិច រៀបចំមេធាវីសម្តេចតេជោ ចាំទទួលពាក្យបណ្តឹង និងធ្វើការសម្របសម្រួល លើរឿងដែលអាច សម្របសម្រួលបាន។ចំពោះរឿងមិនអាចសម្របសម្រួលបានត្រូវប្តឹងទៅតុលាការ ចាត់ការតាមច្បាប់។
៤.ស្នើសុំសមត្ថកិច្ច តាមឃ្លាំមើល
លី សាម៉េត កុំឲ្យរត់ចេញផុតពីសំណាញ់ច្បាប់”៕