ប្រព័ន្ធផ្សព្វផ្សាយក្នុងស្រុកបានរាយការណ៍ កាលពីថ្ងៃពុធ(ទី៦ខែវិច្ឆិកា)ថា អាជ្ញាធរប្រទេសឥណ្ឌូនេស៊ីបានជម្លៀសមនុស្សជិត 2,500 នាក់ចេញពីតំបន់ដែលរងផលប៉ះពាល់ដោយការផ្ទុះភ្នំភ្លើង Lewotobi Laki-laki នៅលើកោះ Flores ក្នុងខេត្ត East Nusa Tenggara ។
ប្រភពពីសារព័ត៌មាន Anadolu។
រដ្ឋមន្ត្រីក្រសួងសង្គមកិច្ច លោក Saifullah Yusuf បាននិយាយថា មន្ត្រីក្នុងតំបន់កំពុងធ្វើការដើម្បីផ្តល់ជំនួយមនុស្សធម៌ដល់ជនភៀសខ្លួននៅក្នុងមជ្ឈមណ្ឌលជម្រកនៅក្នុងតំបន់ដែលរងផលប៉ះពាល់ នេះបើយោងតាមប្រព័ន្ធផ្សព្វផ្សាយ Kompas ។
លោក Yusuf បាននិយាយថា “ជំនួយផ្នែកភស្តុភារបានទៅដល់ជំរុំជនភៀសខ្លួន ដែលប្រមូលផ្តុំនៅក្នុងចំណុចសំខាន់ៗចំនួនបី គឺភូមិ Konga (មនុស្ស 1,219 នាក់) ភូមិ Bokang (មនុស្ស 606 នាក់) និងភូមិ Hokeng (មនុស្ស 647 នាក់) ក៏ដូចជាតំបន់ផ្សេងទៀត” Yusuf បាននិយាយថា។
លោកបានបន្ថែមថាក្រុមឆ្លើយតបគ្រោះ អាសន្នកំពុងតាមដានស្ថានការណ៍នៅតំបន់ រងគ្រោះ។
កាលពីថ្ងៃអង្គារអាជ្ញាធរមូលដ្ឋានបាន និយាយ ថាពួកគេបានស្នើសុំមនុស្សរាប់ពាន់នាក់ឲ្យចាកចេញពីតំបន់ហើយផ្លាស់ទៅជ៉ំរ៉ំ។
យ៉ាងណាមិញ រហូតមកដល់ពេលនេះ មនុស្សយ៉ាងតិច១០នាក់បានស្លាប់ ដោយសារការផ្ទុះភ្នំភ្លើង រួមទាំងដូនជីម្នាក់ ខណៈមនុស្សម្នាក់នៅបាត់ខ្លួននៅឡើយ។ លំហូរកម្អែបានបំផ្លាញអគារជាច្រើន រួមទាំងវត្តអារាមមួយ ហើយក្រុមជួយសង្គ្រោះកំពុងស្វែងរកជនរងគ្រោះបន្ថែមទៀត។
ការផ្ទុះនេះបានប៉ះពាល់ដល់ភូមិចំនួនប្រាំមួយនៅក្នុងស្រុក Wulanggitang និង 4 នៅក្នុងស្រុក Ile Bura ដែលប៉ះពាល់ដល់ប្រជាជនប្រមាណ 10,000 នាក់។ អាជ្ញាធរបានបង្កើនកម្រិតប្រកាសអាសន្នសម្រាប់ភ្នំភ្លើង Lewotobi Laki Laki ដល់ចំណុចខ្ពស់បំផុតរបស់ខ្លួន ខណៈដែលភ្នំភ្លើងនេះបាននិងកំពុងបញ្ចេញផេះពណ៌ត្នោតក្រាស់រហូតដល់ពីរគីឡូម៉ែត្រ (1.24 ម៉ាយ) ជារៀងរាល់ថ្ងៃសម្រាប់សប្តាហ៍មុន។
ប្រទេសឥណ្ឌូណេស៊ី ដែលមានទីតាំងនៅតាមបណ្ដោយ “ក្រវ៉ាត់ភ្លើងប៉ាស៊ីហ្វិក” មានភ្នំភ្លើងសកម្មចំនួន 130 ដែលធ្វើឱ្យវាក្លាយជាប្រទេសមួយក្នុងចំណោមប្រទេសដែលមានសកម្មភាពរញ្ជួយខ្លាំងបំផុតរបស់ពិភពលោក៕