យោធារបស់ប្រទេសលីបង់ និងក្រសួងសុខភាពសាធារណៈបាននិយាយថា ទាហានលីបង់បីនាក់បានស្លាប់នៅក្នុងការវាយប្រហារតាមអាកាសរបស់អ៊ីស្រាអែលទៅលើមូលដ្ឋានទ័ពមួយនៅក្នុងទីក្រុង Sarafand ភាគខាងត្បូងប្រទេសលីបង់ ខណៈដែលជនស៊ីវិលយ៉ាងតិច 17 នាក់ដែលរស់នៅក្បែរកន្លែងនោះបានរងរបួស។
ប្រភពពីសារព័ត៌មានAl Jazeeraថ្ងៃពុធសប្តាហ៍នេះ។
យោធាលីបង់បាននិយាយនៅក្នុងការបង្ហោះនៅលើប្រព័ន្ធផ្សព្វផ្សាយសង្គមកាលពីល្ងាចថ្ងៃអង្គារថា “សត្រូវរបស់អ៊ីស្រាអែលបានកំណត់គោលដៅលើមជ្ឈមណ្ឌលកងទ័ពនៅក្នុងទីក្រុង Sarafand នៅភាគខាងត្បូង ដែលនាំទៅដល់ការធ្វើទុក្ករកម្មរបស់ទាហានបីនាក់” ។
ក្រសួងសុខាភិបាលលីបង់បាននិយាយថា មនុស្ស 17 នាក់បានរងរបួសនៅក្នុងការវាយប្រហារនេះ បន្ទាប់ពីបានរាយការណ៍មុននេះថា ការវាយប្រហាររបស់អ៊ីស្រាអែលនៅទូទាំងប្រទេសក្នុងរយៈពេល 24 ម៉ោងមុនបានសម្លាប់មនុស្ស 28 នាក់ និងរបួស 107នាក់ដែលនាំឱ្យចំនួនអ្នកស្លាប់នៅក្នុងប្រទេសលីបង់ចាប់តាំងពីការប្រយុទ្ធគ្នាបានផ្ទុះឡើងរវាងក្រុមហេសបូឡា និងអ៊ីស្រាអែលក្នុងខែតុលា ឆ្នាំ 2023 ដល់ទៅ 3,544 នាក់បានស្លាប់និងជាង 15,000នាក់ទៀតរងរបួស។
អ្នកនាំពាក្យរបស់កងទ័ពលីបង់ លោក Fadi Eid បានប្រាប់ទីភ្នាក់ងារសារព័ត៌មាន Associated Press (AP) មុនពេលការវាយប្រហារនៅ Sarafand ថាទាហាន 38 នាក់ត្រូវបានសម្លាប់នៅក្នុងការវាយប្រហាររបស់អ៊ីស្រាអែលចាប់តាំងពីខែតុលាឆ្នាំមុន។ ទីភ្នាក់ងារសារព័ត៌មាន AP បានរាយការណ៍ថា ចំនួនអ្នកស្លាប់ និងរបួសចុងក្រោយចំនួនបីនាក់ បានធ្វើឱ្យចំនួនអ្នកស្លាប់សរុបនៅក្នុងកងទ័ពលីបង់កើនឡើងដល់ 41 នាក់៕