លោក វ៉ូឡូឌីមៀ ហ្សេលេនស្គី ប្រធានាធិបតីអ៊ុយក្រែន បាននិយាយថាអ៊ុយក្រែននឹងបរាជ័យ នៅក្នុងសង្រ្គាមរុស្ស៊ីប្រសិនបើអាមេរិកកាត់បន្ថយការផ្ដល់ជំនួយយោធាសម្រាប់ទីក្រុងកៀវ នៅចំពោះមុខភាពមិនច្បាស់លាស់នៃការវិលត្រឡប់មកកាន់អំណាចជាថ្មី របស់លោក ដូណាល់ ត្រាំ។
ប្រភពពីសារព័ត៌មាន AFP។
លោក ហ្សេលេនស្គី ធ្វើការកត់សម្គាល់បែបនេះ នៅក្នុងបទសម្ភាសន៍ជាមួយសារព័ត៌មាន Fox News កាលពីថ្ងៃអង្គារ ទី១៩ ខែវិច្ឆិកា។ លោក ហ្សេលេនស្គី បានគូសបញ្ជាក់ដូច្នេះថា «ប្រសិនបើពួកគេ (សហរដ្ឋអាមេរិក) កាត់បន្ថយជំនួយយោធា ខ្ញុំគិតថាយើងនឹងត្រូវចាញ់។ យើងនឹងប្រយុទ្ធ ហើយយើងមាន អាវុធដែលយើងផលិតដោយខ្លួនឯង។ ប៉ុន្តែវាមិនគ្រប់គ្រាន់ទេដើម្បីទទួលបានជ័យជម្នះ»។
គួរបញ្ជាក់ថា ប្រធានាធិបតីជាប់ឆ្នោតអាមេរិក លោក ដូណាល់ ត្រាំ បានសន្យាម្ដងហើយម្ដងទៀតថាលោកនឹងបញ្ចប់សង្រ្គាមអ៊ុយក្រែនដោយប្រើពេលត្រឹម តែមួយថ្ងៃ នៅក្រោយពេលលោកឡើងកាន់តំណែងជាប្រធានាធិបតីជាផ្លូវការនៅខែមករា ឆ្នាំ២០២៥៕