Manchester City ក្លឹបមេឃខៀវ បានបញ្ជាក់កាលពីថ្ងៃព្រហស្បតិ៍(ទី២១ខែវិច្ឆិកា)ថាអ្នកចាត់ការ Pep Guardiola ដែលកិច្ចសន្យារបស់គាត់នឹងផុតកំណត់នៅចុងរដូវកាល 2024/25 បានចុះហត្ថលេខាលើការបន្តរយៈពេលពីរឆ្នាំ។ ប្រភពពីសារព័ត៌មានAnadolu។
លោក Guardiola បាននិយាយបន្ទាប់ពីពិធីចុះហត្ថលេខាថា “Manchester City មានន័យខ្លាំងណាស់សម្រាប់ខ្ញុំ” ។”នេះគឺជារដូវកាលទី 9 របស់ខ្ញុំនៅទីនេះ។ ពួកយើងបានឆ្លងកាត់ពេលវេលាដ៏អស្ចារ្យជាច្រើនជាមួយគ្នា។ ខ្ញុំពិតជាមានអារម្មណ៍ពិសេសសម្រាប់ក្លឹបបាល់ទាត់មួយនេះ។ នោះហើយជាមូលហេតុដែលខ្ញុំរីករាយណាស់ក្នុងការស្នាក់នៅពីររដូវកាលទៀត” ។
ក្រោមការដឹកនាំរបស់លោក Guardiola ក្លឹប Manchester City បានក្លាយជាក្លឹបដំបូងគេដែលលើកពាន English Premier League បួនដងជាប់ៗគ្នា និងជាក្លឹបដំបូងគេដែលឈានដល់ 100 ពិន្ទុក្នុងមួយរដូវកាល Premier League។
គ្រូបង្វឹកវ័យ 53 ឆ្នាំរូបនេះបានដឹកនាំ Man City ឈ្នះពានរង្វាន់ធំៗចំនួន 18 ក្នុងរយៈពេល 8 រដូវកាលពេញរបស់គាត់ រួមទាំងពានរង្វាន់ Premier League ចំនួន 6 ដង UEFA Champions League មួយ និងពានបីជាប្រវត្តិសាស្ត្រក្នុងឆ្នាំ 2022/23 ៕