អគ្គលេខាធិការអង្គការសហប្រជាជាតិលោក Antonio Guterres កាលពីថ្ងៃអាទិត្យ(ទី១៩ខែមករា) បានសម្តែងការគាំទ្រ សម្រាប់ការអនុវត្តបទឈប់បាញ់ និងការដោះលែងចំណាប់ខ្មាំងនៅហ្គាហ្សា។
ប្រភពពីសារព័ត៌មានAnadolu។
លោក Guterres បាននិយាយនៅក្នុងសារបង្ហោះនៅលើ X ថា “ខ្ញុំស្វាគមន៍ការចាប់ផ្តើមនៃការអនុវត្តបទឈប់បាញ់ និងការដោះលែងចំណាប់ខ្មាំងនៅហ្គាហ្សា” ។
លោកបានសង្កត់ធ្ងន់លើការត្រៀមខ្លួនរបស់អង្គការសហប្រជាជាតិ ក្នុងការជួយ ដោយបញ្ជាក់ថា “យើងត្រៀមខ្លួនរួចជាស្រេច ដើម្បីគាំទ្រការអនុវត្តនេះ និងបង្កើនការផ្តល់ជំនួយមនុស្សធម៌ប្រកបដោយនិរន្តរភាពដល់ប្រជាជនប៉ាឡេស្ទីនរាប់មិនអស់ដែលបន្តរងទុក្ខ”។
ប្រធានអង្គការសហប្រជាជាតិក៏បានសង្កត់ធ្ងន់លើសារៈសំខាន់នៃការដោះស្រាយឧបសគ្គក្នុងការផ្តល់ជំនួយដោយកត់សម្គាល់ថា “វាជាការចាំបាច់ដែលបទឈប់បាញ់ត្រូវតែដកចេញនូវឧបសគ្គផ្នែកសន្តិសុខ និងនយោបាយសំខាន់ៗក្នុងការផ្តល់ជំនួយ” ។
មុននេះ កិច្ចព្រមព្រៀងបទឈប់បាញ់នៅតំបន់ហ្គាហ្សានៅទីបំផុតបានចូលជាធរមានកាលពីថ្ងៃអាទិត្យបន្ទាប់ពីការពន្យារពេលជិតបីម៉ោងដោយក្រុមប្រដាប់អាវុធរបស់ក្រុមហាម៉ាស់គឺកងពលតូច Qassam បានប្រគល់ឈ្លើយសឹកជនជាតិអ៊ីស្រាអែលបីនាក់។ ជាផ្នែកមួយនៃកិច្ចព្រមព្រៀងនេះ ជនជាតិប៉ាឡេស្ទីន 90 នាក់ដែលត្រូវបានឃុំខ្លួននៅក្នុងពន្ធនាគាររបស់អ៊ីស្រាអែលត្រូវបានគេរំពឹងថានឹងត្រូវបានដោះលែងនៅថ្ងៃដំបូងនៃបទឈប់បាញ់។
គួរជម្រាបថា ចាប់តាំងពីថ្ងៃទី 7 ខែតុលា ឆ្នាំ 2023 មនុស្សជិត 47,000 នាក់ ដែលភាគច្រើនជាស្ត្រី និងកុមារត្រូវបានសម្លាប់ និងជាង 110,700 នាក់បានរងរបួសនៅក្នុងអ្វីដែលមន្ត្រីប៉ាឡេស្ទីនបានហៅថាសង្រ្គាមប្រល័យពូជសាសន៍របស់អ៊ីស្រាអែលនៅលើតំបន់ហ្គាហ្សា នេះបើយោងតាមអាជ្ញាធរសុខាភិបាលក្នុងតំបន់៕