ប្រទេសអាល្លឺម៉ង់កាលពីថ្ងៃចន្ទ(ទី១៨ខែវិច្ឆិកា)បានចោទប្រកាន់ប្រទេសចិនថាបានផ្តល់ដ្រូនដល់ប្រទេសរុស្ស៊ីក្នុងសង្គ្រាម ជាមួយអ៊ុយក្រែន ដែលបានចាប់ផ្តើមនៅក្នុងខែកុម្ភៈឆ្នាំ 2022 ហើយហៀបនឹងឈានចូលដល់ថ្ងៃទី 1,000 របស់ខ្លួន។
យោងតាមការចេញផ្សាយដោយ Anadolu នៅថ្ងៃអង្គារនេះ។
រដ្ឋមន្ត្រីការបរទេស លោកស្រី Annalena Baerbock បាននិយាយនៅខាងក្រៅកិច្ចប្រជុំ EU នៅទីក្រុង Brussels ថា “នេះត្រូវតែ និងនឹងមានផលវិបាក” ។
លោកស្រីបានបន្ថែមថា សង្រ្គាមប្រឆាំងនឹងអ៊ុយក្រែនក៏ជាការវាយប្រហារលើសេរីភាពនៅអឺរ៉ុប និងប៉ះពាល់ដល់ផលប្រយោជន៍ស្នូលរបស់រដ្ឋអឺរ៉ុបទាំងអស់ផងដែរ។
សេវាសកម្មភាពខាងក្រៅរបស់អឺរ៉ុប (EEAS) បានបញ្ជាក់មុននេះថា ខ្លួនកំពុងពិនិត្យលើការចង្អុលបង្ហាញថា ដ្រូនកំពុងត្រូវបានផលិតនៅក្នុងប្រទេសចិន សម្រាប់កិច្ចប្រឹងប្រែងធ្វើសង្គ្រាមរបស់រុស្ស៊ី។
មន្ត្រីសហភាពអឺរ៉ុបដែលមិនបញ្ចេញឈ្មោះម្នាក់បាននិយាយថា “យើងបានទទួលរបាយការណ៍ពីប្រភពស៊ើបការណ៍អំពីអត្ថិភាពនៃរោងចក្រនៅក្នុងប្រទេសចិន ដែលផលិតយន្តហោះគ្មានមនុស្សបើកដែលត្រូវបានផ្គត់ផ្គង់ទៅឱ្យប្រទេសរុស្ស៊ី និងប្រើប្រាស់ក្នុងសង្គ្រាមប្រឆាំងនឹងអ៊ុយក្រែន” ។
EEAS ដែលជាដៃការទូតរបស់ប្លុកនេះ បច្ចុប្បន្នកំពុងធ្វើការលើការស្វែងរកថាតើមានកិច្ចសហប្រតិបត្តិការដោយផ្ទាល់រវាងចិន និងរុស្ស៊ីលើផ្នែកសម្ភារៈយោធាដែរឬទេ។ ប្រសិនបើនេះត្រូវបានបញ្ជាក់ ទណ្ឌកម្មអាចត្រូវបានដាក់។
យោងតាមអ្នកការទូត ការផលិតយន្តហោះគ្មានមនុស្សបើកនៅក្នុងប្រទេសចិនត្រូវបានគេនិយាយថាជាគម្រោងរួមគ្នារវាងរុស្ស៊ី ចិន និងអ៊ីរ៉ង់។
គួរជម្រាបថា ប្រទេសចិនដែលរីករាយនឹងភាពជាដៃគូ “គ្មានដែនកំណត់” ជាមួយរុស្ស៊ីបានច្រានចោលការចោទប្រកាន់នេះ។
អ្នកនាំពាក្យក្រសួងការបរទេសចិន លោក Lin Jian បាននិយាយនៅក្នុងទីក្រុងប៉េកាំង នៅមុនកិច្ចប្រជុំរដ្ឋមន្ត្រីការបរទេសសហភាពអឺរ៉ុបថា ទាក់ទងនឹងការនាំចេញអាវុធ ប្រទេសចិនតែងតែប្រកាន់ជំហរទទួលខុសត្រូវ ហើយមិនដែលផ្តល់ឱ្យភាគីជម្លោះជាមួយនឹងអាវុធដ៍សាហាវនោះទេ។
អ្នកនាំពាក្យរូបនេះបាននិយាយថា ប្រទេសចិនគ្រប់គ្រងយ៉ាងតឹងរ៉ឹងនូវយន្តហោះគ្មានមនុស្សបើកសម្រាប់គោលបំណងយោធា និងដែលអាចប្រើប្រាស់សម្រាប់គោលបំណងស៊ីវិល និងយោធាស្របតាមច្បាប់ ដោយបន្ថែមថាទីក្រុងប៉េកាំងសង្ឃឹមថាប្រទេស និងប្រជាជនមួយចំនួនមិនធ្វើការប៉ាន់ស្មានដោយគ្មានមូលដ្ឋានប្រឆាំងនឹងប្រទេសចិន ហើយកុំប្រមាថដល់សាធារណរដ្ឋប្រជាមានិត ដោយគ្មានមូលដ្ឋានជាក់ស្តែង៕