កាលពីថ្ងៃចន្ទ(ទី១៨ខែវិច្ឆិកា) រដ្ឋបាលលោក Joe Biden បានបដិសេធមិនធ្វើអត្ថាធិប្បាយលើរបាយការណ៍ដែលចោទថាខ្លួនបានអនុញ្ញាតដល់អ៊ុយក្រែនក្នុងការប្រើប្រាស់មីស៊ីលរយៈចម្ងាយឆ្ងាយរបស់អាមេរិកដើម្បីវាយប្រហារយ៉ាងជ្រៅទៅក្នុងដីនៃប្រទេសរុស្ស៊ី។
ប្រភពពីសារព័ត៌មានAnadolu។
អ្នកនាំពាក្យមន្ទីរប៉ង់តាហ្គោន Sabrina Singh បានប្រាប់អ្នកយកព័ត៌មានថា “ខ្ញុំមិនមានអ្វីត្រូវផ្តល់នៅពេលនេះទេ នៅពេលនេះ លើរបាយការណ៍ទាំងនោះ ដែលអ្នកកំពុងយោងលើការវាយប្រហាររយៈចម្ងាយឆ្ងាយ” ។
ក្រុមប្រឹក្សាសន្តិសុខជាតិក៏បដិសេធមិនធ្វើអត្ថាធិប្បាយលើរបាយការណ៍នេះដែរ។
គួរជម្រាបថា កន្លងមក រដ្ឋាភិបាលក្រុងវ៉ាស៊ីនតោន បានបញ្ជូនប្រព័ន្ធមីសុីលយុទ្ធសាស្ត្ររយៈចម្ងាយឆ្ងាយ (ATACMS) ទៅកាន់ទីក្រុងគៀវ សម្រាប់យោធាអ៊ុយក្រែនក្នុងការប្រើប្រាស់ពួកវា ដើម្បីវាយប្រហារគោលដៅជ្រៅៗនៅក្នុងប្រទេសរុស្ស៊ី។
នៅពេលដែលរុស្ស៊ីវាយលុកទីក្រុងព្រំដែនអ៊ុយក្រែននៃទីក្រុង Kharkov ក្នុងខែឧសភា លោក Biden បានអនុញ្ញាតឱ្យអ៊ុយក្រែនធ្វើការវាយប្រហារនៅក្នុងទឹកដីរុស្ស៊ី ដែលជាលើកទីមួយក្នុងអំឡុងពេលនៃសង្រ្គាមជាងពីរឆ្នាំ ដើម្បីការពារការវាយប្រហារដែលកើតឡើងនៅជិតព្រំដែនរុស្ស៊ី-អ៊ុយក្រែន ឬសងសឹក។
ការសម្រេចចិត្តនេះធ្វើឡើងបន្ទាប់ពីមាន របាយការណ៍ពីកូរ៉េខាងជើងបញ្ជូនទាហាន ទៅជួយដល់កិច្ចប្រឹងប្រែងធ្វើសង្គ្រាមរបស់ក្រុងម៉ូស្គូ។ មន្ត្រីជាន់ខ្ពស់អាមេរិកម្នាក់បាននិយាយថា វិធានការនេះក៏មានគោលបំណងរារាំងការជាប់ពាក់ព័ន្ធរបស់កូរ៉េខាងជើងបន្ថែមទៀតនៅក្នុងសង្គ្រាមរបស់រុស្ស៊ីលើអ៊ុយក្រែន ដែលបានចាប់ផ្តើមនៅក្នុងខែកុម្ភៈ ឆ្នាំ 2022។
គួរបញ្ជាក់ថា ការសម្រេចចិត្តរបស់លោក Biden បង្ហាញពីការផ្លាស់ប្តូរនៅក្នុងគោលនយោបាយរបស់សហរដ្ឋអាមេរិក ចំពេលមានភាពស្មុគស្មាញជាសកលនៅក្នុងជម្លោះអ៊ុយក្រែន៕