ក្រុមហាម៉ាស់ បានអបអរសាទរប្រជាជនស៊ីរី ចំពោះការផ្តួលរំលំរបប លោក Bashar al-Assad និងបានសម្តែងក្តីសង្ឃឹមថា ស៊ីរី នឹងបន្តគាំទ្រដល់ប្រជាជនប៉ាឡេស្ទីន..!។
ប្រភពពីសារព័ត៌មាន Reuters។
ក្រុមហាម៉ាស់ បាននិយាយនៅក្នុងសេចក្តីថ្លែងការណ៍មួយនៅថ្ងៃចន្ទនេះថា “ចលនាតស៊ូប៉ាឡេស្ទីន Hamas បានបង្ហាញក្តីសង្ឃឹមថា ស៊ីរី ក្រោមការដឹកនាំថ្មី នឹងបន្តគាំទ្រប្រជាជនប៉ាឡេស្ទីន និងការតស៊ូរបស់ពួកគេ”។
សេចក្តីថ្លែងការណ៍នេះបានធ្វើឡើងមួយថ្ងៃបន្ទាប់ពីក្រុមសកម្មប្រយុទ្ធបានសម្រុកចូលក្រុង Damascus បន្ទាប់ពីការវាយលុកស្រាលមួយ ដោយបង្ខំឱ្យប្រធានាធិបតី Bashar al-Assad ចាកចេញពីប្រទេសស៊ីរីទៅកាន់ប្រទេសរុស្ស៊ី ជាកន្លែងដែលគាត់ត្រូវបានផ្តល់សិទ្ធិជ្រកកោន។
ដោយឡែក ក្រុមជីហាតអ៊ីស្លាមដែលជាសម្ព័ន្ធមិត្តរបស់ហាម៉ាស់ ក៏បានសម្តែងក្តីសង្ឃឹមស្រដៀងគ្នានេះផងដែរ។
គួរបញ្ជាក់ថា ទំនាក់ទំនងរវាងហាម៉ាស់ និងរដ្ឋាភិបាលលោក Assad ធ្លាប់មានភាពតានតឹងខ្លាំងនឹងគ្នា បន្ទាប់ពីហាម៉ាស់បានគាំទ្រការបះបោរប្រឆាំងនឹងរដ្ឋាភិបាលស៊ីរី ក្នុងឆ្នាំ ២០១១ និងបានចាកចេញពីទីស្នាក់ការរបស់ខ្លួន នៅក្រុង Damascus ក្នុងឆ្នាំ ២០១២។ ប៉ុន្តែក្រោយមក ក្រុមទាំងពីរបានសម្រេចចិត្តស្តារទំនាក់ទំនងឡើងវិញ។
ទោះជាយ៉ាងណា ក្រុម Hezbollah ដែលជាសម្ព័ន្ធមិត្តរបស់អ៊ីរ៉ង់ និងជាក្រុមគាំទ្រដ៏សំខាន់របស់លោក Assad បានសម្តែងការព្រួយបារម្ភ ចំពោះការដួលរលំនៃរដ្ឋាភិបាលស៊ីរី។
ការដួលរលំនៃរដ្ឋាភិបាលលោក Assad ត្រូវបានមើលឃើញថា ជាការវិវឌ្ឍន៍ដ៏សំខាន់មួយ នៅក្នុងតំបន់មជ្ឈិមបូព៌ា។
វាអាចនឹងប៉ះពាល់ដល់តុល្យភាពអំណាច នៅក្នុងតំបន់ និងអាចនាំឱ្យមានការផ្លាស់ប្តូរ នៅក្នុងគោលនយោបាយការបរទេស របស់ប្រទេសមួយចំនួន៕