ប៉ូលីសក្នុងទីក្រុង Toronto បាននិយាយថា ពួកគេកំពុងស្វែងរកបុរសបីនាក់ ដែលសង្ស័យថាបានចូលរួមក្នុងការបាញ់ប្រហារដែលធ្វើឱ្យមនុស្សយ៉ាងហោចណាស់ 12 នាក់រងរបួសនៅឯហាងស្រាមួយក្នុងទីក្រុងកាណាដា។
ប្រភពពីសារព័ត៌មានAl Jazeera។
យោងតាមអាជ្ញាធរបានឱ្យដឹងថា ខ្មាន់កាំភ្លើងមានគ្នាចំនួនបីនាក់ពាក់ម៉ាស់បានបើកការបាញ់ប្រហារនៅហាង Piper Arms Pub កាលពីយប់ថ្ងៃសុក្រ។ ការវាយប្រហារនេះគឺជាឧបទ្ទវហេតុចុងក្រោយបង្អស់នៅក្នុងការកើនឡើងរយៈពេលជាច្រើនឆ្នាំនៃអំពើហិង្សាដោយកាំភ្លើងនៅក្នុងប្រទេសអាមេរិកខាងជើង ដែលបានជំរុញឱ្យសមាជិកសភាបញ្ឈប់ការលក់អាវុធមួយចំនួនក្នុងរយៈពេលប៉ុន្មានឆ្នាំចុងក្រោយនេះ។
លោក Paul MacIntyre អគ្គនាយកប៉ូលីសបានប្រាប់អ្នកយកព័ត៌មានកាលពីថ្ងៃសៅរ៍ថា “ជនសង្ស័យបានដើរចូលទៅក្នុងបារហើយពួកគេបានបាញ់ដោយមិនរើសមុខទៅលើមនុស្សដែលអង្គុយនៅក្នុងបារ”។
យ៉ាងណាមិញប៉ូលិសបាននិយាយថាមូលហេតុនៃការបាញ់ប្រហារនៅមិនទាន់ច្បាស់នៅឡើយទេ។ការស៊ើបអង្កេតមួយត្រូវបានបើកដំណើរការតាមរកជនសង្ស័យមកផ្ដន្ទាទោស។
គួររំលឹកថា កាលពីខែមេសា ឆ្នាំ 2020 ខ្មាន់កាំភ្លើងម្នាក់បានក្លែងខ្លួនជាប៉ូលីសបានសម្លាប់មនុស្ស 22 នាក់នៅក្នុងខេត្តភាគខាងកើតនៃ Nova Scotia ដែលជាការបាញ់ប្រហារដ៏ធំបំផុតរបស់ប្រទេសកាណាដា។ ប្រទេសនេះបានហាមប្រាមអាវុធប្រភេទយោធា 1,500 ប្រភេទ ប៉ុន្មានថ្ងៃបន្ទាប់ពីការបាញ់ប្រហារ Nova Scotia៕