អាជ្ញាធរគ្រប់គ្រងគ្រោះមហន្តរាយក្នុងតំបន់បាននិយាយកាលពីថ្ងៃអាទិត្យ(ទី៣០ខែមីនា)ថា ចំនួនអ្នកស្លាប់ដោយសាររញ្ជួយដី កាលពីថ្ងៃសុក្រ នៅរដ្ឋធានីបាងកក របស់ប្រទេសថៃ បានកើនឡើងដល់ 17នាក់ ដោយមនុស្ស 32 នាក់បានរងរបួស និង83នាក់ទៀតកំពុងបាត់ខ្លួន។
ប្រភពពីសារព័ត៌មានAljazeera។
យោងតាមនាយកដ្ឋានបង្ការ និងកាត់បន្ថយគ្រោះមហន្តរាយបានឱ្យដឹងថា ការខូចខាតហេដ្ឋារចនាសម្ព័ន្ធត្រូវបានរាយការណ៍នៅក្នុងខេត្តចំនួន 18 ក្នុងចំណោមខេត្តចំនួន 76 របស់ប្រទេស ដោយបានប៉ះពាល់ដល់ផ្ទះចំនួន 420 ខ្នង ប្រាសាទចំនួន 48 មន្ទីរពេទ្យចំនួន 76 និងសាលារៀន និងការិយាល័យរដ្ឋាភិបាលរាប់សិបកន្លែង។
ប្រធាននាយកដ្ឋាន លោក Phasakorn Boonyalak បាននិយាយនៅក្នុងសេចក្តីថ្លែងការណ៍មួយថា ស្ថានភាពកំពុងស្ថិតក្រោមការគ្រប់គ្រង ហើយការវាយតម្លៃនៅក្នុងតំបន់រងផលប៉ះពាល់កំពុងដំណើរការ ដោយប្រូបាប៊ីលីតេនៃការរញ្ជួយដីនឹងធ្លាក់ចុះជាលំដាប់។
លោក Boonyalak បាននិយាយថា នាយកដ្ឋានក៏បានបញ្ជូនក្រុមស្វែងរក និងជួយសង្គ្រោះក្នុងទីក្រុង ជាមួយនឹងឧបករណ៍ឯកទេសពីមជ្ឈមណ្ឌលបង្ការ និងកាត់បន្ថយគ្រោះមហន្តរាយផ្សេងៗទៅកាន់ទីក្រុងបាងកក ដែលជាតំបន់រងគ្រោះខ្លាំងបំផុត ដើម្បីជួយក្នុងកិច្ចខិតខំប្រឹងប្រែងជួយសង្គ្រោះ។
គួរជម្រាបថា គ្រោះរញ្ជួយដីកម្រិត៧.៧ រ៉ិចទ័រ បានវាយប្រហារកាលពីថ្ងៃសុក្រ ជាមួយនឹងចំណុចកណ្តាលនៅតំបន់ Sagaing របស់មីយ៉ាន់ម៉ា ដោយបានសម្លាប់មនុស្ស ១.៦៤៤នាក់ និងរបួស ៣.៤០៨នាក់ នៅក្នុងប្រទេសក្រីក្រនៅអាស៊ីអាគ្នេយ៍មួយនេះ៕