ទីភ្នាក់ងារសារព័ត៌មានស៊ីរី SANA បានរាយការណ៍ថា យន្តហោះចម្បាំងអ៊ីស្រាអែល កាលពីថ្ងៃពុធ(ទី២ខែមេសា)បានធ្វើការវាយប្រហារតាមអាកាសចំនួន១១លើកទៅលើទីក្រុង Damascus និង Hama របស់ប្រទេសស៊ីរី។
ប្រភពពីសារព័ត៌មានAljazeera។
របាយការណ៍បាននិយាយថាការវាយប្រហារតាមអាកាសរបស់អ៊ីស្រាអែលបានកំណត់គោលដៅជុំវិញអគារនៃមជ្ឈមណ្ឌលស្រាវជ្រាវវិទ្យាសាស្ត្រនៅក្នុងសង្កាត់ Barzeh នៃទីក្រុង Damascus។
នៅក្នុងការវាយប្រហារដាច់ដោយឡែកមួយ ការវាយប្រហារតាមអាកាសបានវាយប្រហារជុំវិញទីក្រុង Hama ភាគកណ្តាលប្រទេសស៊ីរី។
ទន្ទឹមនឹងនេះ បណ្តាញ Telegram អភិបាលខេត្ត Hama បានរាយការណ៍ថា “យន្តហោះចម្បាំងរបស់អ៊ីស្រាអែលបានកំណត់គោលដៅអាកាសយានដ្ឋានយោធា Hama និងជុំវិញរបស់វាជាមួយនឹងការវាយប្រហារតាមអាកាសច្រើនជាង 10លើក។
ទាំងស៊ីរី និងអ៊ីស្រាអែល មិនបានចេញសេចក្តីថ្លែងការណ៍ផ្លូវការ ទាក់ទងនឹងការវាយប្រហារតាមអាកាសនោះទេ។
យ៉ាងណាមិញ ពុំ មាន រាយការណ៍ ថា មាន មនុស្ស ស្លាប់ ឬ ខូចខាត ទ្រព្យសម្បត្តិ ឡើយ។
បន្ទាប់ពីការដួលរលំនៃរបប Bashar al-Assad ក្នុងខែធ្នូ អ៊ីស្រាអែលបានពង្រីកការកាន់កាប់របស់ខ្លួននៅតំបន់ Golan Heights របស់ស៊ីរី ដោយដណ្តើមយកតំបន់ការពារគ្មានយោធា ដែលជាទង្វើដែលបំពានលើកិច្ចព្រមព្រៀងផ្តាច់ខ្លួនឆ្នាំ 1974 ជាមួយស៊ីរី។
អ៊ីស្រាអែលក៏បានឆ្លៀតយកប្រយោជន៍ពីការដួលរលំរបស់របបនេះ ដើម្បីបើកការវាយប្រហាររាប់រយ ដែលសំដៅលើទីតាំងយោធា និងទ្រព្យសម្បត្តិនៅទូទាំងប្រទេសស៊ីរី រួមទាំងយន្តហោះចម្បាំង ប្រព័ន្ធមីស៊ីល និងការដំឡើងប្រព័ន្ធការពារដែនអាកាស នេះបើយោងតាមរបាយការណ៍៕