(កណ្តាល)៖ ប្រជាពលរដ្ឋជិត៣០០គ្រួសារ នៅភូមិល្វាទោង ឃុំកំពង់កុង ស្រុកកោះធំ ខេត្តកណ្ដាល បានបញ្ចេញប្រតិកម្ម ដោយសម្ដែងការមិនពេញចិត្តទៅលើអាជ្ញាធរនិងមន្ត្រីជំនាញថា ចុះវាស់វែងជាប្រព័ន្ធ ក្នុងភូមិរបស់ពួកគាត់ គឺបានបាញ់ក្ដោប យកដីប្រាំងរបស់ពួកខ្លួន ដែលនៅជុំវិញ”បឹងស្រូល”ទុកជាសម្បត្តិរដ្ឋ.ដោយគ្មានការយោគយល់..!។
ក្នុងនោះ សូម្បីតែដីដែលនៅជាប់”ព្រែក.ប្រឡាយ.និងផ្លូវបេតុង”ក៏ត្រូវមន្ត្រីសុរិយោដី កាត់ទុកជាចំណីរដ្ឋ អស់ជាច្រើនម៉ែត្រផងដែរ..។
បណ្ដាលឱ្យ ពលរដ្ឋជាច្រើនគ្រួសារ ដែលមានដីតូចៗនៅក្បែរ”បឹងស្រូល”ប្រឡាយ.ព្រែក.និងផ្លូវបេតុង មិនអាចទទួលបាន(ប្លង់កម្មសិទ្ធិ)សម្រាប់ប្រើប្រាស់ជាប្រយោជន៍ក្នុងគ្រួសារ…!។
-ករណីនេះលោកមេឃុំថ្លែងថា
ខ្ញុំយល់ពីទុក្ខលំបាករបស់ពលរដ្ឋ តែមិនដឹងជួយពួកគាត់របៀបណា ព្រោះប្លង់ផែនទីធ្លាក់ពីលើមក..!!។
-ប្រជាពលរដ្ឋ បានលើកឡើងបែបនេះ ក្នុងពេលផ្ទុះការតវ៉ា
ត្រង់ចំណុចដីប្រាំងក្បែរ”បឹងស្រូល”ស្ថិតនៅភូមិល្វាទោង ឃុំកំពង់កុង ស្រុកកោះធំ ខេត្តកណ្ដាល កាលពីថ្ងៃទី៣១.០៣.២០២៥។
ជុំវិញរឿងរ៉ាវខាងលើ ពលរដ្ឋបានអះអាងប្រាប់(ដើមរាំង)ថា ពួកខ្លួនបានកាន់កាប់និងអាស្រ័យផល ធ្វើស្រូវប្រាំងជុំវិញ”បឹងស្រូល”ដែលនៅខាងកើតភូមិល្វាទោង.ឃុំកំពង់កុង ជារៀងរាល់ឆ្នាំ.!។
ពោលគឺគ្រួសារនីមួយៗមានដីប្រាំងសម្រាប់ធ្វើស្រូវចាប់ពី២.០០០ម៉ែត្រការ៉េ.ទៅ២ហិកតា!។
ពលរដ្ឋបន្តថា ពួកខ្លួនបានកាន់កាប់និងធ្វើស្រូវលើដីនេះ តាំងពីឆ្នាំ១៩៨៨មកម្ល៉េះ ដោយមានភ្លឺស្រែ និងព្រំប្រទល់ច្បាស់លាស់…!។
ចម្លែកអីនៅពេលថ្មីៗនេះ ស្រាប់តែមន្ត្រីភូមិបាលស្រុក ចុះវាស់វែងជាប្រព័ន្ធ គឺមិនចេញបង្កាន់ដៃឬប្លង់ ឱ្យពួកគាត់នោះឡើយ ដោយក្រុមមន្ត្រីបានចាត់ទុកដីប្រាំងរបស់ពួកខ្លួនថា ជាដី”បឹងស្រូល”។
ពលរដ្ឋបញ្ជាក់ថា ប្រសិនបើអាជ្ញាធរនិងមន្ត្រីជំនាញ ខ្វល់ខ្វាយពីសុខទុក្ខនិងតម្រូវការចាំបាច់ របស់ពួកខ្លួនមែននោះ គឺងាយស្រួលទេ.!!។
ដោយគ្រាន់តែរៀបចំបែបបទ ក្នុងការកាត់ឆ្វៀលនិងរក្សាទុកដី”បឹងស្រូល”ត្រឹមទំហំ៤០ហិកតា.។
ដោយកំណត់យកព្រំប្រទល់តាមភ្លឺស្រែបច្ចុប្បន្ន.ក្រៅពីហ្នឹងត្រូវកាត់ឆ្វៀល នឹងចេញប្លង់ឱ្យពលរដ្ឋ ទៅតាមដីប្រាំងនីមួយៗ ជាការស្រេចហើយ.!។
មិនដូច្នេះអី ស្រាប់តែមន្ត្រីសុរិយោដីស្រុក ប្រើម៉ាស៊ីនGPS មកបាញ់ក្ដោបយកដីអាស្រ័យផលនិងដីប្រាំងពួកគាត់ ដែលនៅជុំវិញបឹង ទៅកាត់បញ្ចូលជាដី”បឹងស្រូល”ធ្វើឱ្យ”បឹងស្រូល”មានទំហំរហូតដល់ទៅ ២៣៥ហិកតា ទើបពលរដ្ឋកើតទុក្ខមិនសុខចិត្តគ្រប់គ្នា..!!។
មិនត្រឹមតែប៉ុណ្ណោះ បងប្អូនប្រជាពលរដ្ឋជាច្រើនគ្រួសារទៀត ដែលមានដីនៅសងខាង(ផ្លូវបេតុង)តភ្ជាប់ពីផ្លូវលេខ១១០ ចូលក្នុងភូមិល្វាទោង ក៏កំពុងកើតទុក្ខមិនសុខចិត្តផងដែរ ដោយថា មន្ត្រីភូមិបាលស្រុក បានកាត់ទុកចំណីរដ្ឋពី(ផ្លូវបេតុង)សម្រាប់ម្ខាងៗ រហូតដល់ទៅ ២២ម៉ែត្រកន្លះឯណោះ..!។
ធ្វើឱ្យម្ចាស់ដីខ្លះ ដែលមានក្បាលដីជាប់ផ្លូវបេតុង និងមានជម្រៅទៅក្រោយខ្ទង់២០ម៉ែត្រ ត្រូវជាប់គាំងជំនាញមិនចេញប្លង់ឱ្យ។
ជាងនេះទៅទៀត អ្នកដែលមានក្បាលដី ជាប់ផ្លូវបេតុងផង និងកន្ទុយខាងក្រោយ ជាប់និងប្រឡាយផង។
គឺមន្ត្រីភូមិបាលស្រុក កាត់ចំណីផ្លូវខាងមុខអស់ជាង២០ម៉ែត្រ និងកាត់ចំណីប្រឡាយ ខាងក្រោយទៀត។
ជាហេតុនាំឱ្យម្ចាស់ដីមួយចំនួន ដែលមានជម្រៅខ្ទង់៣០ម៉ែត្រ ទៅ៤០ម៉ែត្រ ជាប់គាំងធ្វើប្លង់មិនបាន កើតរឿងឈឺចាប់ និងដេកអស់សង្ឃឹម..!។
-ឆ្លើយតបនិងការលើកឡើងខាងលើនៅរសៀលទី០២.០៤.២០២៥ លោក ហ៊ីង ហ៊ាង មេឃុំកំពង់កុងបានថ្លែងទទួលស្គាល់ថា ការកំណត់យកដី”បឹងស្រូល”ទំហំ២៣៥ហិកតា គឺបានប៉ះពាល់ ពលរដ្ឋជាច្រើនគ្រួសារប្រាកដមែន..!។
លោកមេឃុំបន្តថា ខ្ញុំនៅមូលដ្ឋានខ្ញុំយល់ពីទុក្ខលំបាករបស់ពលរដ្ឋ តែមិនដឹងធ្វើម៉េច ព្រោះប្លង់ផែនទីធ្លាក់ពីលើមក.និងមានកំណត់ទំហំជាស្រេចទៅហើយ។
លោក ហ៊ីង ហ៊ាង អះអាងថា ពលរដ្ឋនៅក្នុងឃុំរបស់លោក មានច្រើនគ្រួសារដែលមិនអាចចេញប្លង់បាន។
ក្នុងនោះ អ្នកខ្លះមានដីលំនៅដ្ឋាន នៅជាប់ដៃទន្លេផង និងជាប់ផ្លូវផង លុះកាត់ចំណីរដ្ឋ ទាំងមុខនិងក្រោយ គឺអស់ដីតែម្ដង.មិនអាចទទួលបាន(ប្លង់កម្មសិទ្ធិ)។
-រីឯលោក រឿង គង់ ប្រធានការិយាល័យ រៀបចំដែនដី នគរូបនីយកម្មសំណង់ និងភូមិបាលស្រុកកោះធំ
បានថ្លែងប្រាប់(ដើមរាំង)ថា.ការវាស់វែងរបស់លោក គឺអនុវត្តតាមផែនទី.ហេតុនេះមិនអាចកាត់ឆ្វៀល តាមសំណើពលរដ្ឋបានទេ..!។
លោកបន្តថា បើយើងកាត់ឆ្វៀលឱ្យម្នាក់ប្រាកដណាស់ ម្នាក់ទៀតនឹងតវ៉ាចង់បានដែរ..!!។
បើតាមលោក រឿង គង់ ប្រសិនបើពលរដ្ឋចង់តវ៉ាទាមទារ គឺទៅតវ៉ានៅខេត្ត..។
-លោក ឆែ វណ្ណឌី អភិបាលស្រុកកោះធំ
មិនអាចសុំការបំភ្លឺបានទេ ខណៈទូរស័ព្ទចូលហើយ គ្មានអ្នកទទួល.!។
-ចំណែកលោក សុក កាន់ណារិទ្ធ ប្រធានមន្ទីររៀបចំដែនដី នគរូបនីយកម្មសំណង់ និងសុរិយោដី ខេត្តកណ្ដាល
បានថ្លែងថា ក្នុងនាមមន្ត្រីជំនាញ មិនអាចចេញ(ប្លង់)តាមការទាមរបស់ពលរដ្ឋនោះឡើយ.ព្រោះគេមានគណៈកម្មការប្រជុំឯកភាពត្រឹមត្រូវ។
លោក សុក កាន់ណារិទ្ធ បន្តថា បើពលរដ្ឋទាមទារបែបនេះ សុំឱ្យពួកគាត់ដាក់សំណើ មកកាន់គណៈកម្មការ ដើម្បីពិនិត្យជាក់ស្ដែង..!។
-លោក ប្រាក់ ឡាក់ ប្រធានមន្ទីរធនធានទឹកនិងឧតុនិយម ខេត្តកណ្ដាល
បានថ្លែងថា គណៈកម្មការនិងជំនាញ គឺអនុវត្តច្បាប់ មិនអាចចេញប្លង់តាមការទាមទាររបស់ពលរដ្ឋនោះឡើយ។
-លោក ជី ស៊ីវុត្ថា នាយករដ្ឋបាលខេត្តកណ្ដាល និងជាអ្នកនាំពាក្យ
មិនអាចសុំការបំភ្លឺបានទេ ដោយទូរស័ព្ទចូលហើយ គ្មានអ្នកទទួល.។
ទោះជាយ៉ាងនេះក្ដី ពលរដ្ឋក្នុងមូលដ្ឋាន សុំស្នើដល់ ឯកឧត្ដម គួច ចំរើន អភិបាលខេត្តកណ្ដាល
ឯកឧត្ដម ថោ ជេដ្ឋា រដ្ឋមន្ត្រីក្រសួងធនធានទឹកនិងឧតុនិយម
ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្មនិងសំណង់
ឯកឧត្ដមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ
ជាពិសេសសម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា
មេត្តាជួយអន្តរាគន៍ មករដ្ឋបាលខេត្តកណ្ដាល និងមន្ទីរសុរិយោដី.ខេត្ត ដើម្បីវាស់វែងកាត់ឆ្វៀល និងចេញប័ណ្ណកម្មសិទ្ធិ(ប្លង់រឹង)ឱ្យពួកគាត់ដោយក្ដីអនុគ្រោះ៕
