(ភ្នំពេញ)៖ អតីតសង្ឃ ជួន កក្កដា បានលាចាកសិក្ខាបទ នៅថ្ងៃទី១៩ ខែមីនា ឆ្នាំ២០២៥ ហើយនៅថ្ងៃទី២៨.០៣.២០២៥ ត្រូវប្រមុខរដ្ឋស្ដីទីតែងតាំងជាអនុរដ្ឋលេខាធិការក្រសួងធម្មការ និងសាសនា តាមសំណើររបស់នាយករដ្ឋមន្ត្រី។
ប៉ុន្តែព្រះរាជក្រឹត្យស្ដីពីការតែងតាំង ទើបតែផ្សព្វផ្សាយនៅថ្ងៃទី០៤ ខែមេសា នេះទេ។
កាលពីព្រឹកថ្ងៃទី១៩ ខែមីនា នៅមុនពិធីលាចាកសិក្ខាបទលោក ជួន កក្កដា មានសង្ឃដីកាពន្យល់ពុទ្ធបរិស័ទថា ការសម្រេចចិត្តលាចាកសិក្ខាបទនាពេលនេះ មិនមែនជាការតក់ក្រហល់ ឬប្រញាប់ពេកនោះទេ ។
ក៏ប៉ុន្តែ ជាការសម្រេចចិត្តមួយសម្រាប់ខ្លួនឯងផ្ទាល់ ពោលគឺ អស់បុណ្យជាព្រះសង្ឃ ក្រោយប្រើពេលជាសង្ឃប្រមាណជាង២៧ព្រះវស្សាមកហើយនោះ។
ជាកូនអ្នកត្រពាំងខ្នារ ឃុំអង្គតាសោម ស្រុកត្រាំកក់ ខេត្តតាកែវ លោក ជួន កក្កដា ។
ជាក្មេងកំព្រាឪពុក រស់នៅជាមួយម្ដាយ ដោយសារតែជីវភាពគ្រួសារខ្វះខាត ម្យ៉ាងដោយឧបនិស្ស័យ និងការលើកទឹកចិត្តពីជីដូន កុមារ ជួន កក្កដា ចូលបួសជាសាមណេរ វ័យ១៣ឆ្នាំ ក្នុងឆ្នាំ១៩៩៨ នៅវត្តវេឡុវ័ន្ត នាភូមិកំណើត៕
