យ៉ាងហោចណាស់ជនស៊ីវិល 13នាក់ត្រូវបានសម្លាប់ និង 19នាក់ផ្សេងទៀតបានរងរបួស នៅក្នុងការបាញ់ផ្លោងដោយកងកម្លាំងគាំទ្ររហ័សប៉ារ៉ាយោធា (RSF) នៅ North Darfur វេជ្ជបណ្ឌិតក្នុងតំបន់បាននិយាយ កាលពីថ្ងៃចន្ទ។ នេះបើយោងតាមការចេញផ្សាយដោយ AANews។
បណ្តាញវេជ្ជបណ្ឌិតស៊ូដង់ បាននិយាយថា អ្នករងរបួសរួមមានកុមារចំនួនប្រាំពីរនាក់ និងស្ត្រីមានផ្ទៃពោះម្នាក់នៅក្នុងការវាយប្រហារដែលបានកំណត់គោលដៅសង្កាត់លំនៅដ្ឋាននៃ El-Fasher រដ្ឋធានីនៃ North Darfur នៅភាគខាងលិចប្រទេសស៊ូដង់។
ក្រុមគ្រូពេទ្យបាននិយាយថា ជនស៊ីវិលជាច្រើននាក់ នៅតែជាប់គាំង ចំពេលមានការទម្លាក់គ្រាប់បែកជាបន្តបន្ទាប់នៅតំបន់នោះ។
របាយការណ៍បាននិយាយថា “ការវាយប្រហាររបស់ RSF ថាជា “ឧក្រិដ្ឋកម្មសង្គ្រាមពេញលេញ និងជាគោលដៅជាប្រព័ន្ធ នៃជីវិតជនស៊ីវិល ចំពេលភាពស្ងៀមស្ងាត់អន្តរជាតិដ៏គួរឱ្យអាម៉ាស់ និងការបរាជ័យក្នុងការការពារអ្នកស្រុករាប់សែននាក់ដែលជាប់នៅក្នុងទីក្រុង”។
ក្រុមនេះ បានអំពាវនាវដល់សហគមន៍អន្តរជាតិ និងក្រុមប្រឹក្សាសន្តិសុខអង្គការសហប្រជាជាតិ ឱ្យចាត់វិធានការជាបន្ទាន់ដើម្បីបញ្ឈប់ការវាយប្រហារលើជនស៊ីវិល និងផ្តល់ការការពារប្រកបដោយប្រសិទ្ធភាពសម្រាប់ប្រជាជនស៊ីវិល និងបុគ្គលិកពេទ្យ។
RSF បានដាក់ការបិទផ្លូវលើ El-Fasher ចាប់តាំងពីថ្ងៃទី 10 ខែឧសភា ឆ្នាំ2024 ទោះបីជាមានការព្រមានជាអន្តរជាតិអំពីគ្រោះថ្នាក់ចំពោះទីក្រុង ដែលជាមជ្ឈមណ្ឌលសម្រាប់ប្រតិបត្តិការមនុស្សធម៌នៅក្នុងរដ្ឋ Darfur ទាំងប្រាំក៏ដោយ។
គួរជម្រាបថា ចាប់តាំងពីពាក់កណ្តាលខែមេសា ឆ្នាំ 2023 ការប៉ះទង្គិចគ្នារវាងកងកម្លាំងទាហានស៊ូដង់ និង RSF បានសម្លាប់មនុស្សជាង 20.000 នាក់ និងប្រហែល 15 លាននាក់ផ្លាស់ទីលំនៅ នេះបើយោងតាមអង្គការសហប្រជាជាតិ និងអាជ្ញាធរមូលដ្ឋាន ខណៈដែលការសិក្សារបស់សាកលវិទ្យាល័យអាមេរិកបានប៉ាន់ប្រមាណចំនួនអ្នកស្លាប់ប្រហែល 130,000៕