ឧបទ្ទវហេតុនៅព្រលានយន្តហោះអន្តរជាតិហុងកុងនៅព្រឹកថ្ងៃចន្ទនេះ បានសម្លាប់បុគ្គលិកសន្តិសុខអាកាសយានដ្ឋានពីរនាក់ បន្ទាប់ពីយន្តហោះដឹកទំនិញមួយបានរអិលចេញពីផ្លូវរត់ ក្រោយពេលចុះចតក្នុងលក្ខខណ្ឌអាកាសធាតុអាក្រក់។
ប្រភពពីសារព័ត៌មានReuters នៅថ្ងៃទី២០ ខែតុលា។
យន្តហោះដែលជាប្រភេទ Boeing 747 cargo ដំណើរការដោយក្រុមហ៊ុនអាកាសចរណ៍ ACT Airlines របស់ប្រទេសទួរគី ក្នុងនាម Emirates SkyCargo បានរអិលចេញពីផ្លូវរត់ភ្លាមៗបន្ទាប់ពីចុះចត ហើយប៉ះទង្គិចជាមួយរថយន្តសន្តិសុខនៅជិតតំបន់ផ្លូវរត់សម្រាប់យន្តហោះ។
អាជ្ញាធរព្រលានយន្តហោះបានបញ្ជាក់ថា បុគ្គលិកពីរនាក់ត្រូវបានស្លាប់ភ្លាមៗនៅកន្លែងកើតហេតុ ខណៈដែលសមាជិកនាវិក ៤ នាក់របស់យន្តហោះបានរត់គេចខ្លួនចេញដោយសុវត្ថិភាព ហើយមិនមានអ្នកណាម្នាក់រងរបួសធ្ងន់ធ្ងរ។
ឧបទ្ទវហេតុនេះត្រូវបានគេពិពណ៌នាថា ជាឧបទ្ទវហេតុមានមនុស្សស្លាប់ច្រើនបំផុតនៅព្រលានយន្តហោះហុងកុង ចាប់តាំងពីឆ្នាំ ១៩៩៩។ ក្រុមស៊ើបអង្កេតបានចាប់ផ្តើមស្រាវជ្រាវបឋម ដើម្បីកំណត់មូលហេតុដែលបណ្តាលឲ្យយន្តហោះរអិលចេញពីផ្លូវរត់។
អ្នកជួបឧបទ្ទវហេតុដែលនៅក្នុងតំបន់បាននិយាយថា ពេលនោះមានភ្លៀងធ្លាក់ខ្លាំង និងខ្យល់បក់ខ្លាំង។ សេចក្តីថ្លែងការណ៍ពី Hong Kong Airport Authority បានបញ្ជាក់ថា ផ្លូវរត់លេខ 07R ត្រូវបានបិទបណ្តោះអាសន្ន ខណៈដែលក្រុមជួយសង្គ្រោះ និងអាជ្ញាធរសុវត្ថិភាពកំពុងសម្អាតកន្លែងកើតហេតុ៕