(ភ្នំពេញ)៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា៖ អ្វីដែលរាជរដ្ឋាភិបាលខិតខំធ្វើគឺត្រឹមតែបង្កើតឱកាស ការដាក់ចេញគោលនយោបាយ ការកែទម្រង់ និងការរៀបចំហេដ្ឋារចនាសម្ព័ន្ធ ។
ប៉ុន្តែការចាប់យកឱកាស និងការបង្កើតឱកាស និងការដាក់ចេញពីផែនការទៅការអនុវត្តជាក់ស្តែងគឺអាស្រ័យលើអាណាព្យាបាល គ្រូ គណៈគ្រប់គ្រង ព្រមទាំងសិស្ស។
ឆ្លៀតក្នុងឱកាសនោះ សម្តេចធិបតី ហ៊ុន ម៉ាណែត បានថ្លែងអំណរគុណដល់បណ្តាប្រទេស និងដៃគូ ដែលក្នុងនោះមានរដ្ឋាភិបាលជប៉ុនតាមរយៈអង្គការJICAដែលចូលរួមគាំទ្រដល់ក្រសួងអប់រំនិងកីឡាក្នុងការបង្កើតវិទ្យាស្ថានគរុកោសល្យភ្នំពេញ និងបាត់ដំបងដែលបានផ្តល់នូវហេដ្ឋរចនាសម្ព័ន្ធរូបវ័ន្តវិនិយោគជាច្រើន ដោយប្រែក្លាយវិទ្យាស្ថាននេះមានសក្តានុពលសម្រាប់ការបណ្តុះបណ្តាលគ្រូ។
សម្តេចធិបតី បានថ្លែងដូចនេះនៅក្នុងឱកាសដែលសម្តេចអញ្ជើញជាអធិបតីក្នុងពិធី ប្រគល់សញ្ញាបត្រដល់គរុនិស្សិតគរុសិស្ស និងសម្ពោធអគារអន្តវេសិកដ្ឋានវិទ្យាស្ថានគរុកោសល្យរាជធានីភ្នំពេញ នៅព្រឹកថ្ងៃទី០៤ ខែមិថុនា ឆ្នាំ២០២៤៕