ប៉ូលិសបាននិយាយថា ចំនួនអ្នកស្លាប់ដោយសារ ការបាក់ដី និងទឹកជំនន់ ដែលបង្កឡើងដោយព្យុះទីហ្វុង Gaemi នៅក្នុងប្រទេសហ្វីលីពីន បានកើនឡើងដល់៣៤នាក់ហើយ ។
ខណៈដែលមនុស្សមួយចំនួន នៅតែបាត់ខ្លួន នៅក្នុងតំបន់ផ្សេងៗគ្នា។
ជនរងគ្រោះ១២នាក់ បានស្លាប់នៅក្នុងតំបន់ Calabarzon,១១ នៅ Metro Manila, ប្រាំបួន Central Luzon និង២នាក់នៅតំបន់ Bicol ។
មនុស្ស២២នាក់ស្លាប់ដោយលង់ទឹក៥នាក់ឆ្លងចរន្តអគ្គិសនី៦នាក់ បាក់ដីនិងម្នាក់ត្រូវដើមឈើរលំ។
មុននេះប្រធានាធិបតី Ferdinand Marcos Jr. បានបញ្ជាឱ្យអាជ្ញាធរពន្លឿនកិច្ចខិតខំប្រឹងប្រែង ក្នុងការផ្តល់អាហារ និងជំនួយផ្សេងទៀតដល់ភូមិជនបទដាច់ស្រយាល។
មជ្ឈមណ្ឌលប្រតិបត្តិការបន្ទាន់កណ្តាលបាននិយាយថា នៅតៃវ៉ាន់ មនុស្សយ៉ាងតិច៨នាក់បានស្លាប់ ជាង៨០០នាក់ បានរងរបួស និងមនុស្សម្នាក់កំពុងបាត់ខ្លួន។
មនុស្សជាច្រើននាក់ទៀតត្រូវបានផ្លាស់ទីលំនៅ។
ចំនួនអ្នករងរបួសខ្ពស់បំផុតគឺ ២៥៩នាក់ត្រូវបានរាយការណ៍នៅក្នុងទីក្រុងកំពង់ផែ Kaohsiung បន្ទាប់មកគឺ១២៥នាក់នៅ Tainan និង១២០នៅ Taichung ។
សេចក្តីថ្លែងការណ៍របស់ក្រសួងការពារជាតិមុននេះបាននិយាយថា ព្យុះទីហ្វុង Gaemi បានរំកិលចេញទៅកាន់ច្រកសមុទ្រតៃវ៉ាន់ ប៉ុន្តែអ្នកស្រុកគួរតែរក្សាការប្រុងប្រយ័ត្នចំពោះខ្យល់ និងភ្លៀង។
ព្យុះទីហ្វុងនេះ បានបោកបក់មកលើប្រទេសចិន បន្ទាប់ពីបានបង្កការបំផ្លិចបំផ្លាញនៅតៃវ៉ាន់ និងហ្វីលីពីន។
មនុស្សជាង១៥០.០០០នាក់រស់នៅក្នុងខេត្ត Fujian ភាគអាគ្នេយ៍ត្រូវបានផ្លាស់ប្តូរទីលំនៅទៅកាន់តំបន់ដែលមានសុវត្ថិភាពជាង។
ក្រសួងហិរញ្ញវត្ថុបានបែងចែកថវិកាចំនួន ៩,២៦ លានដុល្លារសម្រាប់ជួយជួសជុលជាបន្ទាន់ នូវផ្លូវដែលខូចខាតដោយទឹកជំនន់៕