(ភ្នំពេញ)៖ នៅព្រឹកទី២៦ ខែកញ្ញា ឆ្នាំ២០២៤ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានអញ្ជើញជាអធិបតីក្នុងពិធីប្រគល់សញ្ញាបត្រជូននិស្សិតសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ចសរុប ៣,៥៣០នាក់ (នារី១,៨២២នាក់)។
និស្សិតដែលបញ្ចប់ការសិក្សា ដោយជោគជ័យ និងទទួលសញ្ញាបត្រនាព្រឹកថ្ងៃនេះ រួមមានថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់។
សាកលវិទ្យាល័យភូមិន្ទនីតិសាស្រ្ត និងវិទ្យាសាស្រ្តសេដ្ឋកិច្ច ជាគ្រឹះស្ថានអប់រំឧត្តមសិក្សាសាធារណៈមួយ ។
ដែលបាននិងកំពុងដើរតួនាទីយ៉ាងសំខាន់ ក្នុងការបណ្តុះបណ្តាលធនធានមនុស្សផ្នែកច្បាប់ រដ្ឋបាលសាធារណៈ សេដ្ឋកិច្ច និងផ្នែកផ្សេងៗទៀត ដើម្បីបម្រើឲ្យការអភិវឌ្ឍសេដ្ឋកិច្ច និងសង្គមនៅកម្ពុជា។
គិតចាប់ពីឆ្នាំ១៩៨២ ដល់បច្ចុប្បន្ននេះ សិក្ខាកាម និងនិស្សិតដែលបានបញ្ចប់ការសិក្សាជាស្ថាពរសរុប ៧០,៣៣៦នាក់ នារី ២៨,២៧១នាក់ ត្រូវជា ៤០.១៩ភាគរយ ក្នុងនោះនិស្សិតបរទេសមានចំនួន ២៤៨នាក់ នារី ១១០នាក់ ត្រូវជា ៤៤,៣៥ភាគរយ។
និស្សិតជ័យលាភីទាំងនោះកំពុងបម្រើការងារនៅក្នុងក្រសួង ស្ថាប័នរដ្ឋ វិស័យឯកជន អង្គការមិនមែនរដ្ឋាភិបាលជាតិនិងអន្តរជាតិ និងខ្លះទៀតកំពុងប្រកបអាជីវកម្មផ្ទាល់ខ្លួន ប្រកបដោយសមត្ថភាព សេចក្តីថ្លៃថ្នូរ និងកិត្តិយស។
-សាកលវិទ្យាល័យមានក្រុមប្រឹក្សាភិបាល គណៈគ្រប់គ្រង មន្រ្តី បុគ្គលិក សាស្រ្តាចារ្យ ក្របខណ្ឌ និងជាប់កិច្ចសន្យាជាតិ-អន្តរជាតិសរុប ៨៣៥ នាក់ នារី ២១០នាក់ ត្រូវជា ២៥,១៥ ភាគរយ និងមាននិស្សិតកំពុងបណ្តុះបណ្តាលសរុប ១៨,៥៥១នាក់ នារី ៩,៦០៨នាក់ ត្រូវជា ៥១,៧៩ភាគរយ ។
ក្នុងនោះមាននិស្សិតបរទេសចំនួន ៦៨នាក់ នារី ៤០នាក់ ដែលរួមមាន ជនជាតិបារាំង កេនយ៉ា រ៉ូម៉ានី និងឡាវ។
និស្សិតជ័យលាភីដែលនឹងត្រូវទទួលសញ្ញាបត្រពីសម្តេចមហាបវរធិបតីនាយករដ្ឋមន្ត្រី នាពេលនេះមានចំនួនសរុប ៣,៥៣០នាក់ នារី ១.៨២២នាក់ ត្រូវជា ៥១,៦១ភាគរយ ។
ក្នុងនោះរួមមាននិស្សិតថ្នាក់បរិញ្ញាបត្រ ២,៩៤២នាក់ នារី ១,៥៩៦នាក់ និងនិស្សិតថ្នាក់បរិញ្ញាបត្រជាន់ខ្ពស់ ៥៨៨នាក់ នារី ២២៦នាក់។
ដើម្បីធានាបាននូវការបណ្តុះបណ្តាលប្រកបដោយគុណភាព និងនិរន្តរភាព សាកលវិទ្យាល័យបានអនុវត្តយន្តការធានាគុណភាពអប់រំជាពិសេសបានពង្រឹងប្រព័ន្ធវាយតម្លៃគុណភាពអប់រំជាប្រចាំដោយអនុវត្តតាមស្តង់ដាធានាគុណភាពអប់រំសម្រាប់គ្រឹះស្ថានឧត្តមសិក្សា និងកំពុងធ្វើកិច្ចសហប្រតិបត្តិការជាមួយបណ្តាសាកលវិទ្យាល័យបរទេស នៃបណ្តាប្រទេសមួយចំនួន បានចំនួន ៦០ អនុស្សារណៈនៃការយោគយល់គ្នា ដើម្បីធ្វើការផ្លាស់ប្តូរបទពិសោធន៍និស្សិត និងសាស្រ្តាចារ្យលើការសិក្សា ការបង្រៀន ការស្រាវជ្រាវ និងកម្មវិធីបណ្តុះបណ្តាលនានាក្នុងគោលបំណងលើកកម្ពស់គុណភាពអប់រំឲ្យកាន់តែល្អប្រសើរ។
ចាប់តាំងពីឆ្នាំ១៩៩៣ ដល់បច្ចុប្បន្ន សាកលវិទ្យាល័យបានបញ្ជូននិស្សិតទៅបន្តការសិក្សាថ្នាក់បរិញ្ញាបត្រជាន់ខ្ពស់ និងថ្នាក់បណ្ឌិតនៅបរទេស តាមរយៈអាហារូបករណ៍របស់សាកលវិទ្យាល័យជាដៃគូនានាបានចំនួន ១.៩០០នាក់។
ក្នុងឆ្នាំសិក្សា២០២៣-២០២៤ នេះ សាកលវិទ្យាល័យបានបញ្ជូននិស្សិតចំនួន ៣៣នាក់ (នារី ២២នាក់) ទៅបន្តការសិក្សានៅបរទេស ក្នុងនោះថ្នាក់បណ្ឌិតមានចំនួន ១នាក់(ជានារី) ទៅសិក្សាផ្នែកសេដ្ឋកិច្ចនៅប្រទេសបារាំង និងថ្នាក់បរិញ្ញាបត្រជាន់ខ្ពស់មានចំនួន ៣២នាក់ (នារី ២១នាក់) ទៅសិក្សាផ្នែកនីតិសាស្រ្ត និងសេដ្ឋកិច្ចនៅប្រទេសបារាំង ស៊ុយអែដស៍ ហូឡង់ អាមេរិក ចិន ជប៉ុន ថៃ ស្វីស អូស្រ្តាលី ណូវែលសេឡង់ និងចក្រភពអង់គ្លេស ព្រមទាំងបានបញ្ជូននិស្សិតចូលរួមក្នុងកម្មវិធីផ្លាស់ប្តូរការសិក្សាចំនួន៤៦នាក់(នារី៣២នាក់) នៅប្រទេសបារាំង ថៃ ហ្វីលីពីន ប្រ៊ុយណេ សិង្ហបុរី ឥណ្ឌូនេស៊ី វៀតណាម ម៉ាឡេស៊ី ជប៉ុន អាមេរិក អាឡឺម៉ង់ និងអ៊ីតាលី ។
ក្រៅពីនេះ មាននិស្សិតចំនួន ៣០រូប បែងចែកជា៨ក្រុម បានចូលរួមការប្រកួតសវនការប្រឌិតអន្តរជាតិពាក់ព័ន្ធនឹងនីតិអន្តរជាតិ នៅប្រទេសអាមេរិក អូទ្រីស ចិន នេប៉ាល់ ហូឡង់ និងចក្រភពអង់គ្លេស។
នៅចុងឆ្នាំ២០២៤ ខាងមុខនេះ សាកលវិទ្យាល័យត្រៀមនឹងបញ្ជូននិស្សិតចំនួន ១៥រូប ទៅចូលរួមការប្រកួតសវនការប្រឌិតអន្តរជាតិ នៅប្រទេសជប៉ុន ម៉ាឡេស៊ី អាឡឺម៉ង់ និងអូស្រ្តាលី។
ស្ថិតក្នុងបរិយាកាសដ៏រីករាយនេះយើងខ្ញុំទាំងអស់គ្នាជាមន្រ្តីអប់រំគ្រប់លំដាប់ថ្នាក់សាស្រ្តាចារ្យ បុគ្គលិក និស្សិត និងសិស្សានុសិស្ស នៅទូទាំងប្រទេស សូមសម្តែងនូវការគោរពដឹងគុណ និងចងចាំជានិច្ចនូវវីរភាពដ៏ឧត្តុង្គឧត្តមរបស់ សម្តេចតេជោនាយករដ្ឋមន្រ្តី ជាស្ថាបនិកមគ្គុទេសក៏ឯក ជាប្រតិបត្តិករនយោបាយឈ្នះ-ឈ្នះ ដែលបាននាំមកនូវសុខសន្តិភាព៕