ក្រុមមន្ត្រីបាននិយាយកាលពីថ្ងៃសុក្រ(ទី៤ខែតុលា)ថា យ៉ាងហោចណាស់មនុស្ស១៧ នាក់បានស្លាប់!។
ដោយសារភ្លៀងធ្លាក់ខ្លាំងជាបន្តបន្ទាប់ ធ្វើឱ្យរអិលបាក់ដី និងទឹកជំនន់ នៅក្នុងប្រទេសបូស្នៀ និងហឺហ្សេហ្គោវីណា…!។
រដ្ឋបាលការពារជនស៊ីវិល បានអំពាវនាវដល់ប្រជាពលរដ្ឋឱ្យជៀសវាងការធ្វើដំណើរតាមផ្លូវទៅកាន់ក្រុង Konjic និង Jablanica ដោយជំរុញឱ្យមនុស្សគ្រប់គ្នាធ្វើតាមការណែនាំរបស់សេវាសង្គ្រោះ ដើម្បីការពារជនរងគ្រោះបន្ថែមទៀត។
អ្នកស្រុកជាច្រើន ត្រូវបានបង្ខំឱ្យជម្លៀសចេញ ខណៈដែលភ្លៀងធ្លាក់ខ្លាំងបានបណ្តាលឱ្យទឹកទន្លេហូរហៀរ និងបង្កឱ្យមានការរអិលបាក់ដី ដែលរំខានដល់ជីវិតយ៉ាងធ្ងន់ធ្ងរនៅក្នុងទីក្រុង Jablanica និង Konjic ។
ទន្ទឹមនឹងនោះ វាត្រូវបានគេរាយការណ៍ថា ផ្លូវសំខាន់ៗនៅក្នុងតំបន់ត្រូវបានបិទ ហើយវាកំពុងរារាំងដល់កិច្ចខិតខំប្រឹងប្រែងជួយសង្គ្រោះ។
វិហារអ៊ីស្លាមមួយនៅ Jablanica ក៏ត្រូវបានលិចទឹកទាំងស្រុងផងដែរ។
កងកម្លាំងប្រដាប់អាវុធនៃប្រទេសបូស្នៀ និងហឺហ្សេហ្គោវីណា បានចូលរួមនៅក្នុងការជួយជនស៊ីវិលដែលប្រឈមនឹងហានិភ័យពីទឹកជំនន់។
យោងតាមកាកបាទក្រហមនៃសហព័ន្ធបូស្នៀ និងហឺហ្សេហ្គោវីណា អគារលំនៅដ្ឋានជាង 20 ត្រូវបានបំផ្លាញ ហើយអាយុជីវិត និងសុខភាពរបស់គ្រួសាររាប់រយគឺស្ថិតក្នុងហានិភ័យយ៉ាងខ្លាំង។
ដូចគ្នានេះផងដែរ ផ្លូវដែកបានប្រកាសថាមានការខូចខាតយ៉ាងធ្ងន់ធ្ងរដល់កន្លែងផ្លូវដែកដែលមានប្រវែង 17 គីឡូម៉ែត្រ (10.6 ម៉ាយ) ដែលតភ្ជាប់រដ្ឋធានី Sarajevo ។
ការអប់រំត្រូវបានផ្អាកនៅក្នុងតំបន់ដែលរងគ្រោះដោយទឹកជំនន់ ហើយរថយន្តដឹកជញ្ជូនសាធារណៈត្រូវបានគេរាយការណ៍ថាលែងមានសេវាមួយរយៈ។
ក្រៅពីភាគខាងជើងនៃ Herzegovina និងផ្នែកកណ្តាលនៃបូស្នៀ ទីក្រុង Kresevo, Kiseljak និង Fojnica ក៏រងផលប៉ះពាល់ដោយទឹកជំនន់ផងដែរ៕