ប្រព័ន្ធផ្សព្វផ្សាយរដ្ឋបានរាយការណ៍កាលពី ថ្ងៃចន្ទ(១៤ ខែតុលា)ថាប្រទេសចិនប្រតិកម្មទៅនឹង សហរដ្ឋអាមេរិកចំពោះសមយុទ្ធយោធាទ្រង់ទ្រាយធំនៅជុំវិញកោះតៃវ៉ាន់។ដោយចិន អំពាវនាវឱ្យទីក្រុងវ៉ាស៊ីនតោនបោះបង់ចោលការគាំទ្រដល់ “កងកម្លាំងឯករាជ្យ” លើកោះតៃវ៉ាន់។
អ្នកនាំពាក្យក្រសួងការបរទេសចិន លោកស្រី ម៉ៅ នីង បានប្រាប់អ្នកយកព័ត៌មាននៅទីក្រុងប៉េកាំងថា “តៃវ៉ាន់គឺជាផ្នែកមួយរបស់ចិន ដែលមិនអនុញ្ញាតឱ្យមានការជ្រៀតជ្រែកពីបរទេស” ។
លោកស្រី ម៉ៅ បន្តថា “ប្រសិនបើសហរដ្ឋអាមេរិកយកចិត្តទុកដាក់យ៉ាងពិតប្រាកដចំពោះសន្តិភាព និងស្ថិរភាពនៅក្នុងច្រកសមុទ្រតៃវ៉ាន់ វាគួរតែប្រកាន់ខ្ជាប់នូវគោលការណ៍ចិនតែមួយ” ដោយឆ្លើយតបទៅនឹង “ការព្រួយបារម្ភ” ដែលបង្ហាញដោយទីក្រុងវ៉ាស៊ីនតោន បន្ទាប់ពីយោធាចិនបានធ្វើសមយុទ្ធរួមគ្នាជុំវិញកោះតៃវ៉ាន់។
កងទ័ពចិនបានប្រកាសចាប់ផ្តើមសមយុទ្ធទ្រង់ទ្រាយធំជុំវិញកោះតៃវ៉ាន់ ដែលទីក្រុងប៉េកាំងអះអាងថាជាខេត្តបំបែកខ្លួន ដែលជាសមយុទ្ធលើកទីពីរចាប់តាំងពីខែឧសភា នៅពេលដែលប្រធានាធិបតី William Lai Ching-te ត្រូវបានសម្ពោធ។
យោងតាមយោធាចិន សមយុទ្ធនៅជុំវិញតំបន់នៅភាគខាងជើង ភាគខាងត្បូង និងខាងកើតនៃប្រទេសកោះនេះ បានផ្តោតលើការកែលម្អការត្រៀមខ្លួនប្រយុទ្ធតាមអាកាស បិទច្រកសំខាន់ៗ កំណត់គោលដៅដីគោក និងសមុទ្រ និងទទួលបានការគ្រប់គ្រងលើសមរភូមិដ៏ទូលំទូលាយ។
សមយុទ្ធដែលធ្វើឡើងដោយកងទ័ព កងទ័ពជើងទឹក ទ័ពអាកាស និងកម្លាំងរ៉ុក្កែត បានបម្រើការជា “ការរារាំងយ៉ាងខ្លាំងក្លាចំពោះសកម្មភាពទាក់ទងនឹងឯករាជ្យភាពរបស់តៃវ៉ាន់” ហើយចាំបាច់ដើម្បីការពារ “អធិបតេយ្យភាពជាតិ និងឯកភាពជាតិ” របស់ទីក្រុងប៉េកាំង។
ទោះជាយ៉ាងណាក៏ដោយ សហរដ្ឋអាមេរិកបានសម្តែងការព្រួយបារម្ភយ៉ាងខ្លាំងចំពោះសមយុទ្ធដែលបានធ្វើឡើងប៉ុន្មានថ្ងៃបន្ទាប់ពីប្រធានាធិបតីកោះនេះលោក Lai Ching-te បាននិយាយថាទីក្រុងប៉េកាំង “គ្មានសិទ្ធិ” ដើម្បីតំណាងឱ្យកោះតៃវ៉ាន់នោះទេ។
អ្នកនាំពាក្យក្រសួងការបរទេសអាមេរិក លោក Matthew Miller បាននិយាយដោយសំដៅលើយោធាចិនថា សហរដ្ឋអាមេរិកមានការព្រួយបារម្ភយ៉ាងខ្លាំងចំពោះសមយុទ្ធយោធារួមគ្នារបស់កងទ័ពរំដោះប្រជាជនចិននៅច្រកសមុទ្រតៃវ៉ាន់ និងជុំវិញកោះតៃវ៉ាន់។
ប៉ុន្តែលោកម៉ៅបានតបវិញថា “សហរដ្ឋអាមេរិកមិនគួរគាំទ្រ ‘ឯករាជ្យតៃវ៉ាន់’ បញ្ឈប់ការបំពាក់អាវុធតៃវ៉ាន់ និងបញ្ឈប់ការបញ្ជូនសញ្ញាខុសណាមួយទៅកាន់ ‘កងកម្លាំងបំបែកខ្លួនឯករាជ្យតៃវ៉ាន់’ ។
ទីក្រុងប៉េកាំងបានធ្វើសមយុទ្ធស្រដៀងគ្នាកាលពីខែសីហា ឆ្នាំ 2022 បន្ទាប់ពីប្រធានសភាអាមេរិក Nancy Pelosi បានធ្វើដំណើរទៅតៃវ៉ាន់ដោយមិនបានប្រកាស៕