(ភ្នំពេញ)៖ ស្នងការដ្ឋានរាជធានីភ្នំពេញ នៅរសៀលថ្ងៃទី៤ ខែវិច្ឆកា ឆ្នាំ២០២៤ បានបញ្ជាក់ឱ្យដឹងថា ៖ កងកម្លាំងប៉ុស្តិ៍រដ្ឋបាលវាលវង់ នៃអធិការដ្ឋាននគរបាលខណ្ឌ៧មករា សហការជាមួយកម្លាំងនាយកដ្ឋានព្រហ្មទណ្ឌនៃអគ្គស្នងការដ្ឋាននគរបាលជាតិ និងកម្លាំងអធិការដ្ឋាននគរបាលខណ្ឌទួលគោក បានស្រាវជ្រាវឃាត់ខ្លួនយុវជនម្នាក់ដែលបានប្រើប្រាស់អំពើហិង្សា យកខ្សែក្រវ៉ាត់និងកាំបិតតាំងតោ វាយ និងកាប់លើបុរសម្នាក់បណ្តាលឲ្យរងរបួសនិងបំផ្លាញម៉ូតូជនរងគ្រោះ ខណៈមានការប៉ះពាល់ពាក្យសំដីគ្នាបង្កជាជម្លោះ នៅចំណុចភូមិទី១០ សង្កាត់បឹងសាឡាង ខណ្ឌទួលគោកកាលពីវេលាម៉ោងប្រមាណ១២និង២០នាទីថ្ងៃទី០៣ខែវិច្ឆិកា ឆ្នាំ២០២៤។
សមត្ថកិច្ចបញ្ជាក់ថា ៖ ជនសង្ស័យឈ្មោសុខ សានអាយុ៣១ឆ្នាំគ្មានមុខរបរអ្នកដឹកជញ្ជូនរស់នៅផ្ទះលេខ១០ជាន់ទី៦ អគារទី២ផ្លូវ២១១ភូមិ១២សង្កាត់វាលវង់ ខណ្ឌ៧មករា ត្រូវបានឃាត់ខ្លួននៅវេលាម៉ោង១២និង៣០នាទីថ្ងៃទី០៤ខែវិច្ឆិកា ឆ្នាំ២០២៤ បច្ចុប្បន្នជនសង្ស័យត្រូវបានកម្លាំងនាយកដ្ឋាននគរបាលព្រហ្មទណ្ឌនៃអគ្គស្នងការដ្ឋាននគរបាលជាតិនាំយកទៅសាកសួរនិងកសាងសំណុំរឿងចាត់ការតាមនីតិវិធី៕
