ប្រទេសចិនកាលពីថ្ងៃចន្ទ(ទី១២ខែឧសភា) បានសម្តែងការគាំទ្រសម្រាប់កិច្ចចរចាសន្តិភាពដោយផ្ទាល់រវាងរុស្ស៊ីនិងអ៊ុយក្រែន បន្ទាប់ពីសំណើរបស់ប្រធានាធិបតីរុស្ស៊ី លោក វ្ល៉ាឌីមៀ ពូទីន ក្នុងការបន្តការចរចានៅទីក្រុងអ៊ីស្តង់ប៊ុលចាប់ពីថ្ងៃទី ១៥ ឧសភា។
ប្រភពពីសារព័ត៌មានAljazeera។
អ្នកនាំពាក្យក្រសួងការបរទេសចិន លោក Lin Jian បានប្រាប់អ្នកយកព័ត៌មាននៅទីក្រុងប៉េកាំងថាយើងគាំទ្ររាល់កិច្ចខិតខំប្រឹងប្រែងដែលលើកកម្ពស់សន្តិភាព ហើយសង្ឃឹមថាភាគីពាក់ព័ន្ធនឹងបន្តចូលរួមក្នុងកិច្ចសន្ទនា និងការចរចា ដើម្បីសម្រេចបាននូវកិច្ចព្រមព្រៀងសន្តិភាពដ៏ត្រឹមត្រូវ យូរអង្វែងនិងអាចទទួលយកបានទៅវិញទៅមក ដែលទីបំផុតនាំទៅរកដំណោះស្រាយនយោបាយនៃបញ្ហានេះ។
លោក Lin បានឆ្លើយតបទៅនឹងសំណួរទាក់ទងនឹងរបាយការណ៍ដែលថាលោកពូទីនបានស្នើឱ្យមានការចរចាដោយផ្ទាល់ជាមួយអ៊ុយក្រែនដោយគ្មានលក្ខខណ្ឌជាមុន នេះបើយោងតាមកាសែត Global Times ។
លោក Lin បាននិយាយថាយើងតែងតែជឿថាការសន្ទនា និងការចរចាគឺជាផ្លូវដែលអាចសម្រេចបានតែមួយគត់ដើម្បីដោះស្រាយវិបត្តិអ៊ុយក្រែន។
ថ្លែងនៅក្នុងសន្និសីទសារព័ត៌មាននៅទីក្រុងមូស្គូកាលពីថ្ងៃអាទិត្យ លោកពូទីនបានស្នើឱ្យចាប់ផ្តើមកិច្ចចរចាឡើងវិញនៅទីក្រុងអ៊ីស្តង់ប៊ុល ហើយបាននិយាយថាលោកនឹងធ្វើការសន្ទនាតាមទូរស័ព្ទជាមួយប្រធានាធិបតីទួរគីលោក Recep Tayyip Erdogan នៅថ្ងៃចន្ទ និងស្នើសុំវេទិកាសម្រាប់កិច្ចពិភាក្សាដើម្បីពិភាក្សាពីផ្លូវឆ្ពោះទៅរកសន្តិភាពជាមួយអ៊ុយក្រែន។
គួរបញ្ជាក់ថា លោកពូទីនបាននិយាយថា “រុស្ស៊ីបានត្រៀមខ្លួនរួចជាស្រេចក្នុងការចរចាដោយគ្មានលក្ខខណ្ឌ។ មានសង្រ្គាមមួយកំពុងដំណើរការ ហើយយើងស្នើឱ្យបន្តការចរចាឡើងវិញ។ អ្នកដែលស្វែងរកសន្តិភាពពិតប្រាកដនឹងគាំទ្រគំនិតផ្តួចផ្តើមនេះលោកពូទីនបាននិយាយថាបទឈប់បាញ់ថ្មីអាចចរចាបាននៅទីក្រុងអ៊ីស្តង់ប៊ុល៕