យ៉ាងហោចណាស់មនុស្ស265 នាក់បានស្លាប់ ខណៈដែលអ្នកដំណើរតែម្នាក់ប៉ុណ្ណោះនៅរស់រានមានជីវិត នៅពេលដែលជើងហោះហើរ Air India ទៅកាន់ទីក្រុងឡុងដ៍បានធ្លាក់មួយភ្លែត បន្ទាប់ពីហោះចេញពីទីក្រុង Ahmedabad កាលពីថ្ងៃព្រហស្បតិ៍(ទី១២ខែមិថុនា)។
ប្រភពពីសារព័ត៌មានAljazeera។
សារព័ត៌មាន Press Trust of India ដែលដកស្រង់សម្តីប៉ូលិសបានរាយការណ៍ថា សាកសពចំនួន 265 នាក់ត្រូវបានគេរកឃើញបន្ទាប់ពីយន្តហោះ Boeing 787-8 Dreamliner ដែលដឹកអ្នកដំណើរចំនួន 230 នាក់ និងនាវិក 12 នាក់បានធ្លាក់ចូលទៅក្នុងអគារមហាវិទ្យាល័យវេជ្ជសាស្ត្រមួយ។
ក្នុងចំណោមសាកសពសរុប ២៤១នាក់នៅលើជើងហោះហើរ AI171 ត្រូវបានបញ្ជាក់ថាបានស្លាប់ដោយក្រុមហ៊ុនអាកាសចរណ៍ Air India ខណៈដែលអ្នកស្លាប់ដែលនៅសល់ត្រូវបានគេជឿថាជាសិស្ស និងអ្នកស្រុកនៅក្បែរនោះ។
រដ្ឋមន្ត្រីក្រសួងមហាផ្ទៃឥណ្ឌា លោក Amit Shah បន្ទាប់ពីបានទៅមើលកន្លែងធ្លាក់យន្តហោះបាននិយាយថា សីតុណ្ហភាពខ្ពស់ដោយសារតែការដុតឥន្ធនៈនៅក្នុងបំណែកយន្តហោះមិនទុកឱកាសដើម្បីជួយសង្គ្រោះអ្នកដំណើរ។ លោកបានបន្ថែមថាចំនួនអ្នកស្លាប់ចុងក្រោយនឹងត្រូវបានប្រកាសនៅពេលដែលជនរងគ្រោះត្រូវបានផ្ទៀងផ្ទាត់ដោយលទ្ធផល DNA ។
យ៉ាងណាមិញ អ្នកនៅរស់រានមានជីវិតពីឧបទ្ទវហេតុធ្លាក់យន្តហោះនេះត្រូវបានគេកំណត់អត្តសញ្ញាណថាជាជនជាតិអង់គ្លេសដើមកំណើតឥណ្ឌា Viswashkumar Ramesh ដែលត្រូវបានគេបញ្ជូនទៅមន្ទីរពេទ្យ។
ក្រុមហ៊ុនអាកាសចរណ៍បាននិយាយនៅក្នុងសេចក្តីថ្លែងការណ៍មួយថា “Air India សូមចូលរួមរំលែកទុក្ខដ៏ក្រៀមក្រំបំផុតដល់ក្រុមគ្រួសារនៃអ្នកស្លាប់។ កិច្ចខិតខំប្រឹងប្រែងរបស់យើងឥឡូវនេះគឺផ្តោតទាំងស្រុងលើតម្រូវការរបស់អ្នកដែលរងផលប៉ះពាល់ទាំងអស់ គ្រួសាររបស់ពួកគេ និងមនុស្សជាទីស្រឡាញ់។
លោក Vijay Rupani ដែលជាអតីតនាយករដ្ឋមន្ត្រីនៃរដ្ឋ Gujarat រដ្ឋភាគខាងលិចប្រទេសឥណ្ឌា ដែលយន្តហោះបានធ្លាក់នោះ ក៏ត្រូវបានបញ្ជាក់ថាបានស្លាប់ផងដែរ។
ប្រធានាធិបតី Droupadi Murmu បានសម្តែង ការរំលែកទុក្ខដ៏ក្រៀមក្រំដល់សាច់ញាតិរបស់លោកស្រី Rupani ហើយបានហៅឧបទ្ទវហេតុនេះថាជាការបំផ្លិចបំផ្លាញទាំងស្រុង។
នាយករដ្ឋមន្រ្តី Narendra Modi ក៏បានហៅការធ្លាក់យន្តហោះនេះថាសោកសៅហួសថ្លែងដែលបានធ្វើឱ្យយើងភ្ញាក់ផ្អើល និងសោកសៅផងដែរ៕