(បាត់ដំបង)៖ ទីស្នាក់ការច្រកទ្វារអន្តរជាតិភ្នំដី ស្រុកសំពៅលូន ខេត្តបាត់ដំបងបានឱ្យដឹងថា កាលពីថ្ងៃទី២៥ ខែមិថុនា ឆ្នាំ២០២៥ ម៉ោង ២១និង២០នាទីយប់ ការិយាល័យទំនាក់ទំនងព្រំដែនថៃ បានទំនាក់ទំនងមកលោកវរសេនីយ៍ត្រី ប៊ុន វឌ្ឍនៈ ប្រធានក្រុមការងារទំនាក់ទំនងព្រំដែនកម្ពុជា ប្រចាំច្រកទ្វារអន្តរជាតិភ្នំដី(គីឡូ១៣) តាមរយៈប្រព័ន្ធទំនាក់ទំនង Line នៅវេលាម៉ោង ២១និង២០នាទីយប់ ថ្ងៃទី២៥ ខែមិថុនា ឆ្នាំ២០១៥ ដែល មាន ខ្លឹមសារដូចតទៅនេះ ភាគីថៃនឹងបើកច្រកទ្វាអន្តរជាតិច្រកខៅឌីន វេលាម៉ោង ៨:០០នាទីព្រឹក ដល់ ម៉ោង ១៦:០០ នាទីរសៀល៖
១-អនុញ្ញាតឲ្យពលករដែលកកស្ទះ នៅផ្សារថៃ ឲ្យចេញមកប្រទេសកម្ពុជាវិញបាន ។
២-អនុញ្ញាតឲ្យប្រជាពលរដ្ឋខ្មែរចូលទៅទិញទំនិញនៅផ្សារថៃបាន ដោយប្រើលិខិ៎ឆ្លងដែន ។
៣-អនុញ្ញាតឲ្យប្រជាពលរដ្ឋខ្មែរ ដែលមានលិខិតណាត់ពេទ្យ ចូលទៅខេត្តស្រះកែវ ឬ ស្រុកអារញ្ញ បាន ដោយប្រើលិខិតឆ្លងដែល ទៅព្រឹក វិលល្ងាច ។
៤-អ្នកដែលមានជំងឺធ្ងន់ធ្ងរត្រូវបានការអនុញ្ញាត ពីការិយាល័យទំនាក់ទំនង ព្រំដែនថៃ-កម្ពុជា ស្រុកអារញ្ញ ដោយមានការបញ្ជក់ពីក្រុមការងារទំនាក់ទំនងព្រំដែនកម្ពុជា-ថៃ ។
៥-អនុញ្ញាតអោយអ្នកជំងឺដែលបានទទួលការណាត់ពីពេទ្យនៅឯបាងកក អាចធ្វើដំណើរទៅបាន ដោយប្រើលិខិតឆ្លងដែន បានរយះពេល ២ ថ្ងៃ (ករណីអាចនៅបន្តបានលុះត្រាតែពេពេទ្យចេញលិខិតបញ្ជក់ )។
៦-អនុញ្ញាតអោយយាន្តយន្តកម្ពុជា ដែលកកស្ទះ នៅផ្សារថៃ អោយវិលត្រលប់មកកម្ពុជាវិញបាន ។
៧-ហាមម៉ូតូ ឬ យានយន្តគ្រប់ប្រភេទ ចេញពីកម្ពុជា ចូលទៅថៃ ។
៨-ហាម យានយន្តថៃ គ្រប់ប្រភេទ ឆ្លងដែនមកកម្ពុជាបានឡើយ។
សូមបញ្ជាក់ថានៅពេលវេលា បើក និងបិទ ច្រកទ្វាព្រំដែន ដូចបានចែងខាងលើ ដែលអនុញ្ញាតបានត្រឹម ១ថ្ងៃប៉ុណ្ណោះ គឺថ្ងៃទី២៦ ខែមិថុនា ឆ្នាំ២០២៥ ចាប់ពីម៉ោង ៨:០០នាទីព្រឹកនាទី ដល់ម៉ោង ១៦:០០នាទីរសៀលជាកំហិត។
ជាមួយគ្នានេះ នៅខេត្តបន្ទាយមានជ័យ ភាគីថៃបានបិទបើកច្រកដោយឯកតោភាគី ដោយមិនបានជូនដំណឹងមកខាងកម្ពុជានោះទេ ខណៈពេលនេះ ឯកឧត្តម អ៊ុ រាត្រី អភិបាលនៃគណៈអភិបាលខេត្ត បន្ទាយមានជ័យកំពុងនៅច្រកទ្វារអន្តរជាតិ ប៉ោយប៉ែត រង់ចាំមើលស្ថានភាពជាក់ស្តែង៕