(ព្រះសីហនុ)៖ កាលពីថ្ងៃទី២៧ ខែមិថុនា កងទ័ពជើងទឹកកម្ពុជា បានបណ្តេញកប៉ាល់ ដឹកប្រេងថៃ១គ្រឿងឈ្មោះ Chetthanabodi 6 ដែលបានលួចចូលមកក្នុងដែនទឹកកម្ពុជា ក្នុងភូមិសាស្ត្រខេត្តព្រះសីហនុ។
នេះជាការអនុវត្តវិធានការម៉ឺងម៉ាត់ដាក់ចុះដោយរាជរដ្ឋាភិបាលកម្ពុជា។
មិនត្រឹមតែប្រេងទេ កងទ័ពជើងទឹកកម្ពុជាក៏នឹងអនុវត្តយ៉ាងម៉ឺងម៉ាត់ដោយមិនអនុញ្ញាតឱ្យមានការលួចនាំចូលនូវបន្លែផ្លែឈើថៃតាមជើងទឹកផងដែរ។
កាលពីថ្ងៃទី២២ ខែមិថុនា ឆ្នាំ២០២៥ រាជរដ្ឋាភិបាលកម្ពុជាបានផ្អាកការនាំចូលប្រេងឥន្ធនៈនិងឧស្ម័នឥន្ធនៈគ្រប់ប្រភេទពីប្រទេសថៃ។
សម្តេចធិបតី ហ៊ុន ម៉ាណែត នាយករដ្ឋមន្ត្រី បានគូសបញ្ជាក់ថា បណ្ដាក្រុមហ៊ុនចែកចាយប្រេងឥន្ធនៈនៅកម្ពុជា មានលទ្ធភាពនាំចូលប្រេងឥន្ធនៈនិងឧស្ម័នឥន្ធនៈពីប្រភពផ្សេងគ្រប់គ្រាន់ ដើម្បីផ្គត់ផ្គង់តម្រូវការប្រើប្រាស់ក្នុងស្រុករបស់ប្រជាពលរដ្ឋយើង កុំថាឡើយត្រឹមមួយខែ ទោះជារៀងរហូតក៏មិនជាបញ្ហា។
ឯកឧត្តម កែវ រតនៈ រដ្ឋមន្ត្រីក្រសួងរ៉ែនិងថាមពលបានថ្លែងនៅថ្ងៃទី២៧ ខែមិថុនា ឆ្នាំ២០២៥ នេះផងដែរថាចាប់តាំងពីឱសានវាទរបស់រាជរដ្ឋាភិបាលចូលជាធរមានមក មិនមានការអនុញ្ញាតឱ្យនាំចូលប្រេងនិងឧស្ម័នឥន្ធនៈពីថៃមកកម្ពុជាដាច់ខាត ហើយកម្ពុជាមានសមត្ថភាពគ្រប់គ្រាន់ក្នុងការផ្គត់ផ្គង់ប្រេងនិងឧស្ម័នឥន្ធនៈសម្រាប់តម្រូវការខ្លួនពេញលេញ៕