យោងតាមទីភ្នាក់ងារសារព័ត៌មានជាតិផ្លូវការរបស់ប្រទេសលីបង់ បានឱ្យដឹងថាកងទ័ពអ៊ីស្រាអែលកាលពីថ្ងៃពុធ(ទី៤ខែធ្នូ) បានប្រព្រឹត្តបទល្មើសចំនួន 12 បន្ថែមទៀតចំពោះបទឈប់បាញ់រវាងអ៊ីស្រាអែល និងលីបង់ ដែលបានចូលជាធរមានកាលពីសប្តាហ៍មុន ។
ប្រភពពីសារព័ត៌មានAnadolu។
របាយការណ៍បាននិយាយថាការបំពានរបស់អ៊ីស្រាអែលត្រូវបានចងក្រងជាឯកសារនៅក្នុងស្រុក Tyre, Marjayoun និង Bent Jbeil នៅភាគខាងត្បូងប្រទេសលីបង់ និងនៅក្នុងទីក្រុង Beirut ផងដែរ។
ការរំលោភបំពានរួមមានការបំផ្លិចបំផ្លាញផ្ទះសម្បែង ការបាញ់ផ្លោងកាំភ្លើងធំ ការហោះហើរលើយន្តហោះចម្បាំងលើទឹកដីលីបង់ ការបាញ់កាំភ្លើង និងការលុកលុយ។
យោងតាមទីភ្នាក់ងារសារព័ត៌មាន បានឲ្យដឹងថា យន្តហោះគ្មានមនុស្សបើករបស់អ៊ីស្រាអែល បានវាយប្រហារលើរថយន្តមួយនៅក្នុងក្រុង Majdalzoun នៃស្រុក Tire ខណៈដែលកាំភ្លើងធំរបស់អ៊ីស្រាអែល បានបាញ់ផ្លោងលើវាលទំនាប Marjayoun យ៉ាងហោចណាស់បីដងក្នុងមួយថ្ងៃ។
អ៊ីស្រាអែល បានបាញ់សំដៅទៅកាន់សង្កាត់ នានាក្នុងក្រុង Bent Jbeil។ យោងតាមទីភ្នាក់ងារព័ត៌មានបាន
ឲ្យដឹងថាកងទ័ពអ៊ីស្រាអែលក៏បានបំផ្លាញផ្ទះនៅ ក្នុងទីប្រជុំជន Khiyam និងបានបាញ់ ផ្លោង កាំភ្លើង ធំទៅលើ Kfarkela។
យោងតាមអ្នកយកព័ត៌មាន Anadolu បានឱ្យដឹងថា យន្តហោះចម្បាំងអ៊ីស្រាអែលក៏ត្រូវបានគេមើលឃើញថាកំពុងហោះហើរពីលើរដ្ឋធានី Beirut និងនៅលើតំបន់ភាគខាងត្បូងក្នុងរយៈកម្ពស់ទាប។
ប្រទេសលីបង់បានរាយការណ៍ថាមានការរំលោភលើបទឈប់បាញ់ចំនួន 129 ចាប់តាំងពីកិច្ចព្រមព្រៀងនេះចូលជាធរមានកាលពីសប្តាហ៍មុនក្នុងក្តីសង្ឃឹមថានឹងបញ្ចប់ការប្រយុទ្ធគ្នារយៈពេល 14 ខែរវាងកងទ័ពអ៊ីស្រាអែល និងក្រុមហេសបូឡា។
យោងតាមតួលេខ Anadolu ផ្អែកលើតួលេខរបស់ក្រសួងសុខាភិបាល យ៉ាងហោចណាស់មនុស្ស 14 នាក់បានស្លាប់ និង 13 នាក់ផ្សេងទៀតបានរងរបួសនៅក្នុងការវាយប្រហាររបស់អ៊ីស្រាអែលចាប់តាំងពីសប្តាហ៍មុន។
នៅក្រោមលក្ខខណ្ឌនៃបទឈប់បាញ់ អ៊ីស្រាអែលត្រូវដកកងកម្លាំងរបស់ខ្លួនចេញនៅភាគខាងត្បូងនៃខ្សែបន្ទាត់ពណ៌ខៀវតាមព្រំដែនក្នុងលក្ខណៈជាដំណាក់កាល ខណៈដែលកងទ័ពលីបង់ដាក់ពង្រាយកងកម្លាំងរបស់ខ្លួននៅភាគខាងត្បូងលីបង់ក្នុងរយៈពេលអតិបរមា 60 ថ្ងៃ។
យ៉ាងណាមិញ ការអនុវត្តកិច្ចព្រមព្រៀងគឺត្រូវត្រួតពិនិត្យដោយសហរដ្ឋអាមេរិក និងបារាំង ប៉ុន្តែព័ត៌មានលម្អិតស្តីពីយន្តការអនុវត្តនៅតែមិនច្បាស់លាស់។
គួរជម្រាបថា មនុស្សជាង 4,000 នាក់ត្រូវបានសម្លាប់ និងជាង 16,500 នាក់បានរងរបួសនៅក្នុងការវាយប្រហាររបស់អ៊ីស្រាអែលនៅក្នុងប្រទេសលីបង់ ហើយជាង 1 លាននាក់ផ្សេងទៀតត្រូវបានផ្លាស់ទីលំនៅចាប់តាំងពីខែតុលា ឆ្នាំ 2023 នេះបើយោងតាមអាជ្ញាធរសុខាភិបាលលីបង់៕