នៅថ្ងៃចន្ទ(ទី១៣ខែមករា)លោក Takeshi Iwaya រដ្ឋមន្រ្តីការបរទេសជប៉ុន ត្រូវបានគេរាយការណ៍ថា នឹងធ្វើដំណើរទស្សនកិច្ចទៅកាន់ប្រទេសកូរ៉េខាងត្បូង ក្នុងគោលបំណងពង្រឹងកិច្ចសហប្រតិបត្តិការសន្តិសុខ រវាងប្រទេសជិតខាងនៅអាស៊ីបូព៌ាទាំងពីរ។
ប្រភពពីសារព័ត៌មាន Reuters។
ដំណើរទស្សនកិច្ចនេះ ធ្វើឡើងចំពេលមានការព្រួយបារម្ភ អំពីការកើនឡើង នៃឥទ្ធិពលរបស់ចិននៅក្នុងតំបន់ និងភាពចលាចលនយោបាយ នៅក្នុងប្រទេសកូរ៉េខាងត្បូង។
លោក Iwaya ដែលនឹងក្លាយជារដ្ឋមន្រ្តីការបរទេសជប៉ុនដំបូងគេ ដែលធ្វើទស្សនកិច្ចនៅទីក្រុងសេអ៊ូល ក្នុងរយៈពេល ៧ ឆ្នាំចុងក្រោយនេះ គ្រោងនឹងជួបពិភាក្សា ជាមួយសមភាគីកូរ៉េខាងត្បូង និងប្រធានាធិបតីស្តីទី។ លោកនឹងបញ្ជាក់ជាថ្មី អំពីសារៈសំខាន់នៃទំនាក់ទំនងទ្វេភាគី និងកិច្ចសហប្រតិបត្តិការរវាងប្រទេសទាំងពីរ។
ទោះជាយ៉ាងណា ដំណើរទស្សនកិច្ចនេះ កើតឡើងក្នុងពេលដែលកូរ៉េខាងត្បូង កំពុងជួបប្រទះវិបត្តិនយោបាយ បន្ទាប់ពីប្រធានាធិបតី Yoon Suk Yeol ត្រូវបានចោទប្រកាន់ និងព្យួរពីតំណែង។ ភាពមិនប្រាកដប្រជានៃស្ថានការណ៍នយោបាយនៅកូរ៉េខាងត្បូងនេះ ត្រូវបានគេមើលឃើញថា អាចនឹងប៉ះពាល់ដល់កិច្ចសហប្រតិបត្តិការសន្តិសុខរវាងប្រទេសទាំងពីរ។ លើសពីនេះ ការផ្លាស់ប្តូររដ្ឋបាលនៅសហរដ្ឋអាមេរិក ក៏អាចនឹងប៉ះពាល់ដល់កិច្ចសហប្រតិបត្តិការសន្តិសុខត្រីភាគីរវាងជប៉ុន កូរ៉េខាងត្បូង និងសហរដ្ឋអាមេរិកផងដែរ៕