កាលពីថ្ងៃពុធ(ទី15ខែមករា) ភ្នាក់ងារពន្លត់អគ្គីភ័យជាតិបាននិយាយថា បុរសម្នាក់បានដុតខ្លួនឯងនៅជិតការិយាល័យស៊ើបអង្កេតអំពើពុករលួយរបស់ប្រទេសកូរ៉េខាងត្បូង ដែលជាកន្លែងលោក Yoon Suk Yeol កំពុងត្រូវបានសួរចម្លើយជុំវិញការចោទប្រកាន់ពីបទបះបោរ។
ប្រភពពីសារព័ត៌មាន Reuters។
បុរសវ័យ ៦០ឆ្នាំរូបនេះ បានរងរបួសភ្លើងឆេះយ៉ាងធ្ងន់ធ្ងរ និងសន្លប់បាត់ស្មារតី បន្ទាប់ពីហេតុការណ៍នេះបានកើតឡើងកាលពីវេលាម៉ោង ៨ យប់ ម៉ោងក្នុងស្រុក។ ទោះជាយ៉ាងណា ទីភ្នាក់ងារព័ត៌មានយ៉ុនហាប់បានរាយការណ៍ថា បុរសនោះបានស្លាប់ហើយ។
គួរបញ្ជាក់ថា នៅពេលកើតហេតុ មនុស្សរាប់សិបនាក់ដែលតវ៉ាប្រឆាំងនឹងការចាប់ខ្លួនលោក Yoon ពាក់ព័ន្ធនឹងការសម្រេចចិត្តដ៏ចម្រូងចម្រាសរបស់លោក ក្នុងការប្រកាសច្បាប់អាជ្ញាសឹក កាលពីថ្ងៃទី ៣ ខែធ្នូ នៅតែបន្តការប្រមូលផ្តុំនៅខាងក្រៅការិយាល័យ។ ការប្រកាសច្បាប់អាជ្ញាសឹកនោះបានធ្វើឱ្យប្រទេសកូរ៉េខាងត្បូង ធ្លាក់ក្នុងភាពចលាចលនយោបាយយ៉ាងខ្លាំង៕