កាលពីថ្ងៃចន្ទ(ទី២៧ខែមករា)មេបញ្ជាការឆ្មាំបដិវត្តន៍ជាន់ខ្ពស់របស់អ៊ីរ៉ង់ បានប្រកាសឱ្យដឹងថា អ៊ីរ៉ង់បានទិញយន្តហោះចម្បាំង Sukhoi-35 ពីរុស្ស៊ីជាលើកដំបូងដែលអ៊ីរ៉ង់ទទួលស្គាល់ជាសាធារណៈ អំពីការទិញយន្តហោះចម្បាំងទំនើបទាំងនេះ។
ប្រភពពីសារព័ត៌មាន Reuters នៅថ្ងៃទី២៧ ខែមករា ឆ្នាំ២០២៥។
ទោះយ៉ាងណា លោក Ali Shadmani ដែលត្រូវបានដកស្រង់សម្តីដោយបណ្តាញ ព័ត៌មាននិស្សិត មិនបានបញ្ជាក់ពីចំនួនយន្តហោះដែលត្រូវបានទិញ ឬថាតើយន្តហោះទាំងនោះត្រូវបានបញ្ជូនទៅដល់ប្រទេសអ៊ីរ៉ង់ហើយ ឬនៅនោះទេ។
មេបញ្ជាការរូបនោះគ្រាន់តែបានបញ្ជាក់ថា អ៊ីរ៉ង់បានត្រៀមខ្លួនរួចរាល់ក្នុងការប្រើប្រាស់កម្លាំងយោធាដើម្បីការពារខ្លួន និងបានព្រមានអ៊ីស្រាអែលកុំឱ្យធ្វើសកម្មភាព ដែលអាចនាំឱ្យមានជម្លោះ។
កាលពីខែវិច្ឆិកា ឆ្នាំ ២០២៣ ទីភ្នាក់ងារសារព័ត៌មាន Tasnim របស់អ៊ីរ៉ង់បានរាយការណ៍ ថា ទីក្រុងតេអេរ៉ង់បានសម្រេចកិច្ចព្រមព្រៀងចុងក្រោយក្នុងការទិញ-លក់យន្តហោះចម្បាំង។ ហើយនៅដើមខែនេះ អ៊ីរ៉ង់និងរុស្ស៊ី បានចុះហត្ថលេខាលើភាពជាដៃគូយុទ្ធសាស្ត្រដ៏ទូលំទូលាយមួយ ដែលមិនបាននិយាយអំពីការផ្ទេរអាវុធ ប៉ុន្តែបានបញ្ជាក់ថា ប្រទេសទាំងពីរនឹងអភិវឌ្ឍ «កិច្ចសហប្រតិបត្តិការបច្ចេកទេសយោធា» របស់ពួកគេ៕