(ភ្នំពេញ)៖ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា រាជរដ្ឋាភិបាល គ្រោងវិនិយោគអភិវឌ្ឍកំពង់ផែខេត្តព្រះសីហនុ នៅជំហានទី៣ ជិត ១ពាន់លានដុល្លារ ត្រឹមឆ្នាំ២០២៩។
សម្តេចធិបតី បានថ្លែងបែបនេះក្នុងឱកាសអញ្ជើញសម្ពោធដាក់ឱ្យប្រើប្រាស់ជាផ្លូវការ អគារសិក្សា អគារស្នាក់នៅរបស់គ្រូបង្រៀន ទីចាត់ការ និងអគារកាត់ដេរ នៅវិទ្យាល័យ ហ៊ុនសែន វាលរេញ នាព្រឹកថ្ងៃទី២៦ ខែមីនា ឆ្នាំ២០២៥។
សម្តេចបវរធិបតី បានឱ្យដឹងថា ខេត្តព្រះសីហនុ គឺជាខេត្តនាំមុខ នៅកំពង់ទឹកជ្រៅ ក្នុងចំណោមប្រទេសកម្ពុជា ពិតណាស់ កម្ពុជា មានកំពង់ផែខេត្តកំពត កំពង់ផែកោះកុង និងផែផ្សេងៗទៀត។
សម្តេចបវរធិបតី មានប្រសាសន៍ថា «ខ្ញុំ ធ្លាប់បានប្រាប់ហើយថា អត់ប្រកួតបានជាមួយកំពង់ផែព្រះសីហនុទេ ហើយប្រទេសរបស់យើង ក៏ត្រូវកំណត់គោលដៅផែអាទិភាពធំ ខេត្តផ្សេងទៀតក៏យើងត្រូវអភិវឌ្ឍដែរ នៅកោះកុង នៅកំពត។
ប៉ុន្ដែសម្រាប់កត្តានុពល និងការវិនិយោគ យើងដូចគ្រោងពីនេះទៅដល់ ឆ្នាំ២០២៩ នូវជំហានទី៣ យើងគ្រោងវិនិយោគជិត ១ពាន់លានដុល្លារបន្ថែមទៀត។
សម្តេចបវរធិបតី បន្ដថា ឥឡូវនេះជំហានទី១ មានការពង្រីក ពង្រឹង ខេត្តព្រះសីហនុ។
សម្ដេច រំលឹកថា កាលពីឆ្នាំទៅ សម្ដេច អញ្ជើញសម្ពោធកំពង់ផែនៅខេត្តព្រះសីហនុ ដោយចាយថវិកាជាង ២០០លានដុល្លារ ដោយឥណទានសហការជាមួយជប៉ុន ដូច្នេះ នៅសល់ពីរដំណាក់កាលទៀតជា ៦០០លានដុល្លារ រាជរដ្ឋាភិបាល មានការវិនិយោគធំណាស់ ទៅលើកំពង់ផែខេត្តព្រះសីហនុ មិនត្រឹមតែជាផែអន្ដរជាតិនោះទេ តែរៀបចំតំបន់ ភស្ដុភារកម្ម ដើម្បីបម្រើវិស័យដឹកជញ្ជូន។
សម្ដេចនាយករដ្ឋមន្ដ្រី បានឱ្យដឹងទៀតថា សក្ដានុពលខេត្តព្រះសីហនុ នឹងកាន់តែរីកធំតទៅទៀតនាពេលខាងមុខ ប៉ុន្ដែអ្វីដែលត្រូវការសំខាន់បំផុតនោះ គឺធនធានមនុស្សក្នុងខេត្ត៕