កាលពីថ្ងៃចន្ទ(ទី២៨ខែមេសា) ប្រធានាធិបតីរុស្ស៊ី លោក វ្ល៉ាឌីមៀ ពូទីន បានប្រកាសបទ៖ ឈប់បាញ់ជាឯកតោភាគី រយៈពេលបីថ្ងៃនៅសប្តាហ៍ក្រោយ ក្នុងប្រទេសអ៊ុយក្រែន។ ខណៈដែលទីក្រុងម៉ូស្គូ គ្រោងនឹងប្រារព្ធខួបលើកទី80 នៃជ័យជម្នះរបស់សហភាពសូវៀត លើពួកណាស៊ីអាល្លឺម៉ង់ក្នុងអំឡុងសង្គ្រាមលោកលើកទីពីរ។
ប្រភពពីសារព័ត៌មានAnadolu Agency។
សេចក្តីថ្លែងការណ៍របស់វិមានក្រឹមឡាំងបាននិយាយថា ដោយផ្អែកលើការពិចារណាមនុស្សធម៌លោកពូទីនបានបញ្ជាឱ្យបញ្ឈប់រាល់សកម្មភាពយោធានៅក្នុងប្រទេសអ៊ុយក្រែន ចាប់ពីថ្ងៃទី8 ដល់ថ្ងៃទី 10 ខែឧសភា នៅថ្ងៃប្រារព្ធទិវាជ័យជំនះ80 ឆ្នាំ។
សេចក្តីថ្លែងការណ៍បាននិយាយថារុស្ស៊ីជឿថាភាគីអ៊ុយក្រែនគួរតែធ្វើតាមគំរូនេះដោយបន្ថែមថាទីក្រុងម៉ូស្គូ នឹងផ្តល់ការឆ្លើយតបគ្រប់គ្រាន់និងមានប្រសិទ្ធភាពប្រសិនបើបទឈប់បាញ់ត្រូវបានរំលោភដោយអ៊ុយក្រែន។
ភាគីរុស្ស៊ីបានប្រកាសជាថ្មីម្តងទៀតនូវការត្រៀមខ្លួនរបស់ខ្លួនសម្រាប់កិច្ចចរចាសន្តិភាពដោយគ្មានលក្ខខណ្ឌជាមុន សំដៅលុបបំបាត់មូលហេតុឫសគល់នៃវិបត្តិអ៊ុយក្រែន និងអន្តរកម្មស្ថាបនាជាមួយដៃគូអន្តរជាតិ។
គួរជម្រាបថា ទិវាជ័យជំនះ គឺជាថ្ងៃបុណ្យមួយដែលត្រូវបានប្រារព្ធឡើងនៅក្នុងប្រទេសរុស្ស៊ី និងបណ្តាប្រទេសនានាក្នុងអតីតសហភាពសូវៀតនៅថ្ងៃទី 9 ខែឧសភា ដើម្បីរំលឹកដល់ការចុះចាញ់របស់ណាស៊ីអាល្លឺម៉ង់ក្នុងកំឡុងសង្គ្រាមលោកលើកទី 2 ដែលជាជម្លោះដែលរុស្ស៊ីហៅជាផ្លូវការថាសង្រ្គាមស្នេហាជាតិដ៏អស្ចារ្យ៕