ចំនួនអ្នកស្លាប់ដោយសារការវាយប្រហារសងសឹករបស់អ៊ីរ៉ង់មកលើអ៊ីស្រាអែលបានកើនឡើងដល3នាក់ និង172 នាក់ផ្សេងទៀតបានរងរបួស នេះបើយោងតាមរបាយការណ៍ប្រព័ន្ធផ្សព្វផ្សាយរបស់អ៊ីស្រាអែល។
ប្រភពពីសារព័ត៌មានAljazeera។
ប្រព័ន្ធផ្សព្វផ្សាយបានរាយការណ៍ថា ជនជាតិអ៊ីស្រាអែលពីរនាក់ទៀតដែលរងរបួសក្នុងការវាយប្រហារដោយកាំជ្រួចមួយនៅកណ្តាលអ៊ីស្រាអែល ត្រូវបានប្រកាសថាបានស្លាប់។
របាយការណ៍បាននិយាយថាចំនួនជនជាតិអ៊ីស្រាអែលដែលរងរបួសក្នុងការវាយប្រហាររបស់អ៊ីរ៉ង់បានកើនឡើងដល់ 172។ ពួកគេត្រូវបានបញ្ជូនទៅមន្ទីរពេទ្យ។ របាយការណ៍បាននិយាយថាអ្នករងរបួសភាគច្រើនស្ថិតក្នុងស្ថានភាពស្រាល។
ទូរទស្សន៍ Channel 12 បានរាយការណ៍ថា ជនជាតិអ៊ីស្រាអែលប្រហែល 300 នាក់នៅទីក្រុង Greater Tel Aviv ត្រូវបានជម្លៀសចេញ បន្ទាប់ពីផ្ទះរបស់ពួកគេត្រូវបានខូចខាត ខណៈដែលជនជាតិអ៊ីស្រាអែលចំនួន100 នាក់ត្រូវបានជម្លៀសចេញនៅក្នុងក្រុង Ramat Gan ក្បែរទីក្រុង Tel Aviv ។
យោងតាមសារព័ត៌មាន Haaretz ប្រចាំថ្ងៃ បានឲ្យដឹងថា គ្រាប់រ៉ុក្កែតរបស់អ៊ីរ៉ង់ បានបំផ្លាញអគារចំនួន៩ទាំងស្រុងនិងបានបង្កការខូចខាតដល់ផ្ទះល្វែង និងយានជំនិះរាប់រយខ្នងនៅក្នុងទីក្រុង Ramat Gan។
កាសែត Kan បានរាយការណ៍ថា ការស្ទាក់ចាប់ពីលើអាកាសត្រូវបានគេមើលឃើញពីលើទីក្រុង Tehran បន្ទាប់ពីការវាយប្រហាររបស់អ៊ីស្រាអែលជាថ្មី។
គួររំលឹកថា នៅព្រឹកព្រលឹមថ្ងៃសុក្រ កងកម្លាំងអ៊ីស្រាអែលបានវាយប្រហារអ៊ីរ៉ង់ ដោយវាយលុកទីតាំងនុយក្លេអ៊ែរ និងមីស៊ីល និងបានសម្លាប់មនុស្សជាង១០៤នាក់ រួមទាំងមេបញ្ជាការយោធាកំពូល និងអ្នកវិទ្យាសាស្ត្រ និងជិត ៣៨០នាក់ផ្សេងទៀតរងរបួស។
យោងតាមរបាយការណ៍ អ៊ីរ៉ង់បានឆ្លើយតបជាមួយនឹងកាំជ្រួចផ្លោងសំដៅលើតំបន់ជាច្រើននៅទូទាំងប្រទេសអ៊ីស្រាអែល ដោយបានសម្លាប់មនុស្ស 3 នាក់ និងជាង 170 នាក់ផ្សេងទៀតរងរបួស៕