កាលពីថ្ងៃសុក្រ(ទី២០ខែមិថុនា) អូស្ត្រាលី ប្រកាសថាខ្លួនបានផ្អាកប្រតិបត្តិការនៅស្ថានទូតរបស់ខ្លួនក្នុងរដ្ឋធានីតេអេរ៉ង់របស់អ៊ីរ៉ង់ ហើយបានបញ្ជាឱ្យអ្នកការទូត និងក្រុមគ្រួសាររបស់ពួកគេចាកចេញពីប្រទេសនេះ។
ប្រភពពីសារព័ត៌មានReuters។
នៅក្នុងសេចក្តីថ្លែងការណ៍មួយ រដ្ឋមន្ត្រីការបរទេស Penny Wong បាននិយាយថា រដ្ឋាភិបាលបានធ្វើការសម្រេចចិត្តដោយផ្អែកលើការណែនាំអំពីបរិយាកាសសន្តិសុខដែលកំពុងធ្លាក់ចុះនៅក្នុងប្រទេសអ៊ីរ៉ង់។
ទោះជាយ៉ាងនេះក្តី ឯកអគ្គរដ្ឋទូតអូស្ត្រាលីប្រចាំនៅអ៊ីរ៉ង់នឹងនៅតែស្ថិតនៅក្នុងតំបន់ ដើម្បីគាំទ្រការឆ្លើយតបរបស់រដ្ឋាភិបាលអូស្ត្រាលីចំពោះវិបត្តិនេះ។
អ្នកស្រីបានបន្ថែមថាយើងជំរុញឱ្យប្រជាជនអូស្ត្រាលីដែលអាចចាកចេញពីប្រទេសអ៊ីរ៉ង់ឱ្យធ្វើដូច្នេះឥឡូវនេះ ប្រសិនបើមានសុវត្ថិភាព។ អ្នកដែលមិនអាចធ្វើបាន ឬមិនចង់ចាកចេញ ត្រូវបានគេណែនាំឱ្យជ្រកកោននៅកន្លែង”។
ក្រសួងការបរទេសអូស្ត្រាលីក៏បានដាក់ពង្រាយបុគ្គលិកកុងស៊ុលទៅកាន់ Azerbaijan រួមទាំងច្រកព្រំដែនរបស់ខ្លួនផងដែរ ដើម្បីគាំទ្រដល់ប្រជាជនអូស្ត្រាលីដែលចាកចេញពីប្រទេសអ៊ីរ៉ង់ នេះបើយោងតាមសេចក្តីថ្លែងការណ៍។
ភាពតានតឹងក្នុងតំបន់បានកើនឡើងចាប់តាំងពីថ្ងៃទី 13 ខែមិថុនា នៅពេលដែលអ៊ីស្រាអែលបើកការវាយប្រហារតាមអាកាសលើទីតាំងជាច្រើននៅទូទាំងប្រទេសអ៊ីរ៉ង់ រួមទាំងកន្លែងយោធា និងនុយក្លេអ៊ែរ ដែលជំរុញឱ្យទីក្រុងតេអេរ៉ង់ចាប់ផ្តើមការវាយប្រហារសងសឹក។
អាជ្ញាធរអ៊ីស្រាអែលបាននិយាយថា យ៉ាងហោចណាស់មនុស្ស 25 នាក់បានស្លាប់ និងរាប់រយនាក់បានរងរបួសចាប់តាំងពីពេលនោះមក នៅក្នុងការវាយប្រហារដោយមីស៊ីលរបស់អ៊ីរ៉ង់។
ទន្ទឹមនឹងនេះដែរ នៅក្នុងប្រទេសអ៊ីរ៉ង់ មនុស្សចំនួន ៦៣៩ នាក់ត្រូវបានសម្លាប់ និងជាង ១.៣០០ នាក់បានរងរបួសនៅក្នុងការវាយប្រហារបស់អ៊ីស្រាអែល នេះបើយោងតាមរបាយការណ៍របស់ប្រព័ន្ធផ្សព្វផ្សាយអ៊ីរ៉ង់៕